Marythar Kambinda

KATIMA MULILOS – Hâ a ǂhanusi !oabade hōsa !hūǁîna nî sī!nâ ǁkhāsa ǂgaoǂgao!nâs di ǂâibasens ase tsî ǁkhāti ǂkhanuse administrasis ǂhanu-aisib disa ǂhau!nâ, ǁaeb ai tsî !ereamxasiba ra ū!nâhe ǀgaub !nâ ǁkhaeǁnâs di ǁgūbas ase di ge ǀGapi ǁNâu!gâ!khaib ǀgora!gâde Katima Mulilos ai ge ǂnāǁnâ. Nē ǀgora!gâdi ge 17 nē ǁkhâb dis ai ge tsoatsoa tsî ǁkhâbǀunis ai nî !gûǀam. 

Nēs ge ǁkhāti a ǂguro !nā ǀGapi ǁNâu!gâ!khaib sîsenxasigu Katima Mulilos !nâ ra ūhâhesa tsî !âubasenhe rasa !oa ǁNâu!gâ-ao Presidenti Petrus Damaseb xa nî !khōdanahese. ǁÎb ge haka ǂkhawadīb ǁhōna nî mûǂam hîa hoana a !gams dina. Nē ǁhōn ge Kavangob Aiǂoas !nâ ge dītoahe tsî ǁkharaba a ǁgui-aihetoa haka ǂkhaeadīb ǁhōna ra sao. 

ǂOa ge wekheb aib ge ǂhôamāǂui-i tawa gere !hoa soab aib ge !nakaǂnôa sîsenǂuira direkteri ǂHanu-aisib Beros dib, Khaepriums Swartza ge mî, ǀGapi ǁNâu!gâ!khaib di sîsenxasigu Katima Mulilos !nâgu di !aromas, ǂkhawadīb ǁhōn hîa Zambezi ǀkharib !nâ sîsentoahe tamase mân di !gôaga ǀoroǀoros !aromasa. 

Swartzi ge ai!â ge mî, nē ǁhōna Katima Mulilos !nâ sîsenais kai huib ase ǀGapi ǁNâu!gâ!khaib ǀAwas !âba nî ībasa, ǁîn ǁnāpa Zambezib ǁhōna ǁnâu!gâs !ereamsa ūhâ amaga. Katima Mulilos ǁnâu!gâs ǁhōn !aroma nî ǂgaihe mû!gâ-aon ge a Katimas di tsî nēs !nâ-ū marisi-aib ai ǂgui māǂuide ra sâu.  “Nē sîsenǀgaub ge ǁkhāti ǁkhā-ǁkhāsens !ēsa ǂnoaba-aon hîa ǀkharigu !nâ hân tsî ǁnāti ī turaba ūhâna ra mā in ǂhanu-aisib !âb !nâ !â,” tib ge gere mî. 

“ǂHanu-aisib !nâ ǂgom!gâba tani!kharu tsî ǀgaiǀgais !aroma i ge a ǂhâbasa ǂHanu-aisib nî aimâ-aose īsa, !hūǁîn !oabade nî sī!nâ tsî ǁkhāti -ǁaeb ai, ǀgora-e dī!nâhe tama tsî ǂhanu-aise !oabahesa,” tib ge Swartza ge mî.Zambezi ǀkharisi mûǂamaob, Lawrence Sampofub ge ǂhanu-aisib !âb di ǂgaikhâisa ǁkhoreǁhare tsî ge mî, ǁîn nî ǁnâu!gâdi !aroma ra hâ !naride ǁaraǂuisa tsî ǁnās ǀkha marisiǁgâib hîa ǁnān hîa ǁnâu!gâdi !nâ ra !ân ai ra hâba nî ūbēsa. “Nē ǁaxasib ge sida ǁaes !aroma kaise a ǀō-aisa !nae!khaisa. 

Nēs ge nî ǂguro !nā i, ǀGapi ǁNâu!gâ!khaib Zambezi ǀkharib hîa ǀgui ǀkharisi ǁnâu!gâ!khaib tsî ǀgam ǁnâu!gâ!khaikha hîa Ngomas tsî Impalila !nā!nuis !aroma ǂhanusise a xoamâisakha ūhâb !nâ hā ǁîb sîsenxasiga ra dīsa,” tib ge gere ǂan!gâ.