KATIMA MULILOS – Kabinets di Sekretareb, George Simataab ge ǀguis khami ī !gâi mî-e ǂhanub sîsenaon hîa sîsengu âna ra ǁnā!gâna ūhâba tama go hâ i, xawe koasa ǀnî ministeridi hîa ǂoaǂamsa sîsenna ra dīde ge mā. !Gōsaseb ge, ministeris ǂurusib dis tsî !hū!nāsiǁhōn dis hâra ǁîra di ǂoaǂamsa !oabade mās !aroma gere !khōǀkhā, xawe gem î, ǂauna ǂhanub di ministeridi, berodi tsî ǂnûiǂgādi (OMAs) noxopa khaos ai hâsa ǂgaoǀkhāsa !oabade !oaba-aona nî māse is !nâ, mâsib hîab Simataaba gere ǀgonǀgon!gao !naua!noexase ǂâisa nî ǂnûi-aihese.
Simataab ge nē gowaǂuisensa ǂoa ge wekheb Donertaxs aib ge ǂganams ǁaxasib haka tsēde ge !khōǂgā hâ i 2023ǁî kurib di Afrikab ǂHanub !Oabas Tsēs dis ǁaxasib hîa Katima Mulilos !nâ ge hâ ib tawa ge dī. Nē tsēs ge ǂgaiǂams “Afrikab ge !Norasa ǂHarugub !âse (AfCFTA) !Aromas ǀKha ra ǀGau Afrikab ǂHanub Administrasisa nî ǂhâba !Gâi!gâba sī!nâs !aroma”. Simataab gere !gā!gā !khais ge, nausab Namibiaba ǀHûhâib !Oabas Daoǁgauba ge ū!oa !hū!nāsi !nāmab îb !naka nî sîsenheb ase, ǁîb hîa khoese !gao!gaoga xu hâba, hâ a !oaba ǀgauga !gâi!gâi!nâ ai ǂâisa ǂnûi hâse, xawe di ge noxopa ǂauna ministeridi, berodi tsî ǂnûiǂgādi ǂhanub dide nē daoǁgaub ai !gaoǁgui hâse sîsen tama hâ. “ǂGui ǀhûhâib !oabas daoǁgauga da ge !kharaga berodi ǂnuwiǂgoagu ai ra mû, xawe sîsenūhe tama hâ. A da hoatsama nē daoǁgaub ǂgaoǀkhādi !oagu sada sîsenna dī re,” tib ge gere ǂgan.
“Sa !oaba-aonats ge ǁaeb ai nî oe-am. Hanats ga noxopa ǁî-i ǂhâsib di !ereamsa ūhâba tama i, xawe ǁî-i sîǂkhanisats go !khō!oas ǂan!gâsa mā re tsî ǁnā ǂgans ai-i ra sîsenhesa,” tib ge Simataaba gere mî.
ǁKhā ǁaxasib tawa ge !nakaǂnôa ministers ǂharugub dis, Verna Sinimbos xa ǂGuro Ministers Saara Kuugongelwa-Amadhilas di ǀons !nâ gere khomaihe gowaǀîs, !nâs ge ǁîsa gere mî, ǂhanub !oabas !gâi!gâba AfCFTAsa sī!nâs di ǁaegub ase māsa. “Nēs ge !gao!gao ǁkhāsigu tsî ǁkhāsigu hîan ǂhanub sîsenaona ūhâgu in ǁîn ǁgūbadi ǁî!nāpe Afrikab !nâ ǂharugus ǁgūbade sī!nâ tsî ǁnās ǀkha !hūsâuǁkhāsib omkhâisa AU ǁAni !Hūgu !nâ khoraǂui,” tis ge ǂguro ministersa gere mî.
ǂHanub !oabadi beros Namibiab dis ge ǂguro !nās ase ǂan!gâ mādawa-amde ge mā. Auditer-xenerali beros tsî Erongo ǀKharisi ǀAwemā!nans hâra ge ǀhûǁarebese hoan xa a ǂoaǂamsa !oaba-aona !oaba mās ǁguisa daoǁguigu !oagus di dansa ge !khō!oa.