• August 19th, 2019
Login / Register

Sipatela salipiyo sikwalulwa simubuso mwa Katima



KATIMA MULILO – Sipatelanyana sesibona zalikalafo zabatu babakula butuku bwa lipiyo ili sesise sikuyuzi sililo sabakuli balipiyo mwasikiliti sa Zambezi, nesikwaluzwi simubuso ki Likwambuyu wa Makete ni Pabalelo ya Sicaba Dr Kalumbi Shangula Labune. Kwamulaho bakuli kuzwelela tolopo yefumaneha mutulo upa nebazamayanga musipili walibima zalikiti zepeli kamyanda yemibeli, kuzwa mwasikiliti sa Zambezi kutaha kwamuleneñi kwa Windoko kwalikalafo zalipiyo. Babañwi nese batutezi kwa Windoko ni Ongwediva kuli batoba bukaufi nilipatela. Mwamanzwi ahae, Shangula natalusize kuli sipatelanyana sikacinca mupilelo wabatu babakatazwa kilipiyo mwasikiliti sa Zambezi. 

“Nina nisepotuna kuli sipatelanyana se sikafa likalafo zekonwa kufumanwa mwalinaha zeñwi zezwezipili. Kakuekeza sipatelanyana salipiyo se sikasebeza kaswalisano nisipatela saluna kubona kuli bayahi banaha mwasikiliti bababalelwa hande hahulu,” nabulezi. Natalusize hape kuli kukwalulwa kwasipatelanyana kizwelopili yetuna mwatolopo ya Katima Mulilo, mi ikaba tompotuna kwalineku la makete. Sipatelanyana siluwilwe ki Dr Glendah Kalunga, ñaka yacilaukile mwalikalafo zalipiyo ili yasangile limo zelishumi kazelobañwi inge ili ñaka wamakete. Hana bulela kanako yakukwalula sipatelanyana nabulezi kuli “neli musipili omutelele kono kikale lutofita.” Natolokile kuli sipatelanyana sikatalima hahulu fasilelezo, kuswala butuku kapili, nikufofaza kuzwelapili kwabutuku bwa lipiyo. 

“Lukaba nilisebelezo zakutatuba butuku kuli lukone kufa likelezo kubabali mwamayemo maswe akufumana butuku bwa lipiyo… Sipatelanyana salipiyo sikafa likalafo zabutuku bwalipiyo mwakalulo yaku amuhela milyani kakuzwisa zemasila mwamubili,” nabulezi. Kanako yacwale sipatelanyana sina nimishini yemibeli ili teñi bakuli ba amuhela likalafo kalihola zene, kono sikona kuba nimishini yelobapeli haiba tokwahalo inge ibateñi. Kono mishini yacwale ikona kufa likalafo kwabakuli balishumi kabababeli mwalihola zelishumi kazepeli zamusebezi, kapa bakuli bamashumi amabeli kababane mwalihola zemashumi amabeli kazene. Kanako yacwale bakuli basupile banze baamuhela likalafo zabona kwasipatelanyana. Kakubata kukutiseza sicaba Dr Kalunga nazibahalize kuli bakafa litabubo zalipiyo zamahala ze 5 000 mwalilimo zepeli zetaha kwabakuli. Kanako ye utusiwa kibaoki babalalu nimukenisi alimuñwi.


Aron Mushaukwa
2019-07-15 10:21:15 1 months ago

Be the first to post a comment...

You might also like...