Omukiintu gwomimvo dhopokati ngoka ye nokanena ke ke na uulema, ya kala nokunwa omeya gomomatale, ota indile omayambindhindho moshigwana kwathelwe oshimaliwa opo a futilwe owili ye yomeya.
Lydia Iilonga ngoka a hokolele oshifokundaneki shika nkene a mono iihuna uule nethimbo, okwa ti okwa li ha mono omayambindhindho kelelo lyondoolopa lyOshakati nomeya, ngoka ngaashingeyi anyengwa okufuta.
“Onda tulilwa po omeya pegumbo kelelo lyondoolopa, nooshoka otashi pula opo ndi fute N$5000. Onda tila ga patwe, ishewe oshoka onda lombwela ndi fute oshimaliwa shoka,” ta ti ngaaka.
Ta fatulula kutya oshimaliwa shoka oshoku futa ashike owili ndyoka ya tulwa po, nonando omeya ngoka otaga ende nale.
Ta ti omeya oga patuluka lotango oshiwike sha zi ko.
“Elelo lyondoolopa lyOshakati olya kuthandje muupika shili, otandi pandula. Oya lombwelendje ndi kale tandi futu ko sigo nda mana okufuta oshimaliwa shoka,” ta ti ngaaka.
Iilonga ta hokolola kutya ke na nando iiyemo yasha, ka kele koN$250 ndyoka ha mono yokanona ke kokamati hoka kena uulema.
“Okanona kandje Frans Simaneka komimvo heyali, ihaka popi ko ihaka ende. Oha zala omilambo ye ohali ashike iikulya iipu,” ta ti ngaaka.
Ta ti, iimaliwa mbyoka ha mono komwendhi ihayi gwanitha po oombumbwe ndhe adhihe, sho osho shoka hi i adha keena omilambo mokati komwendhi.
Ta gwedha po kutya ngele ina mona iilonga yokoonyala nena ina mona sha shokulya.
“Omeya ngoka nda kala noku nwa taga zi momatale oga nigila, no taga vulu oku nayipika onkalo uvu wokanona kandje, onkene onda tila ndi shune monkalo ndyoka ngele itandi futu omeya ngoka,” ta popi ngaaka.
Iilonga ta ti, ota opo indile moshigwana shi mu yambindhindhe no noshimaliwa shoka, opo a fute owili ye yomeya. Ta ti kehe ngoka ta vulu okumuyambindhindha na ndhenge konomola 0816881058