New Era Newspaper

New Era Epaper
Icon Collap
...
Home / Ta pula oshiwana shi yambidide omutekulu nokatemba

Ta pula oshiwana shi yambidide omutekulu nokatemba

2021-07-02  Festus Hamalwa

Ta pula oshiwana shi yambidide omutekulu nokatemba

Omukulupe weedula 65, omukalimo momukunda Ontana moshitukulwa shaShikoto ota longo noudjuu okutekula okatekulu ke na oulema oko paife ka wanifa omido 16. 

Ta ti Ndamona Hangula, okwa dalwa noulema, e na olutu lihe na eenghono, iha ende, iha dulu okupenduka ile okulikwafa. Inakulu oo paife he mu file oshisho ita dulu oku mu pa efiloshishi la wana shaashi okaana aka kake na okatemba. Omolwonghalo oyo, omukulupe ou ita dulu okukwafela okatekulu, onghee oku li momhumbwe
inene yokatemba. 

Hilma Nghishidimbwa okwa hokololela Kundana ta ti omutekulu waye okwa dalwa noulema, onghee oku li meshongo linene.

“Ofye ashike tu li mo meumbo naye, ohandi longo noudjuu shaashi kashipu okutonatela omunhu e na oulema. Omutekulu wange iha dulu nokweenda, oha kala a shike e li omutumba meumbo. Onghee ohandi indile moshiwana opo shi kwafele omutekulwa wange opo a dule okumona okatemba,” Nghishidimbwa ta ti.

Nghishidimbwa okwa ti ngeenge ta i kopendjela ile koundingosho oha fiye a
patela okaana monduda shaashi oha kala
a tila ka kwatwe nande onghonga kovakolokoshi.

“Pomudingonoko wetu ohapa lopotwa ounona vahapu va ninga oihakanwa yekwatonghonga neenghono, onghee ngeenge andi di mo meumbo ohandi fiye nda patela Ndamona monduda. Itandi dulu ndi dje mo naye meumbo shaashi onda kulupa, na vali itandi dulu oku mu yambula po,” Nghishidimbwa ta ti. Okwa ti ngeno okwa li pe na katemba ngeno oha dulu okukala ta di mo meumbo nokatekulu.

“Ohandi longifa okamaliwa ketu aka handi mono okudilila kepangelo, ashike inaka wanena natango eemhumbwe detu. Okaana ohaka djala nominambo shaashi ihaka dulu okulikwafa koovene. Ohatu longifa oshimaliwa shihapu, ominambo odi na ondilo,” Nghishidimbwa ta ti. 

Okwa weda po ta ti okaana ihaka dulu okulya kuko vene shaashi kake na sha eenghono meenyala.

Okwa ti kukeshe ou e na ehalo lokukwafela Hangula na kwatafane nombelewa yakansela yopashikandjohoololo ile a kwatafane naye konomolo yongodi, 0812992688.


2021-07-02  Festus Hamalwa

Share on social media