“Ame onda xulila ashike mondodo onhi-8, ashike Kalunga okwa pa nge omaano okulonga niikwatenda. Ovanhu ohava ti kutya inandi longwa shaashi ndi na ondjapo yondodo onhi-8. Mopaife ngaha ondi udite etumba shaashi ondi na ongeshefa yange mwene yokuxwikila oitenda”.

Aa omatumbulo aKadito Paulinu weedula 30 ta hokolola nghee ovanhu va kala nokumusheka eshi vati a xulila mondodo onhi-8.

Paulinu oku na ongeshefa yaye mwene yokuxwikila oitenda ngaashi omatemba eetuwa, oifolomifo, eembete, nosho tuu. Paulinu oha xwikilile pOmaalala, moshitukulwa shaShana.

“Ohandi pandula Kalunga shaashi okwa pa nge omaano ounongo wokulonga niikwatenda. Onghee eshi osha pa nge omanenedilaadilo opo ndi tote po ongeshefa yange kokuxwikila opo ndi shiive okushakeneka epangelo ondjilakati,” Paulinu ta ti.

Mopaife ngaha Paulinu okwa kuta ovanhu vatano hava longo naye okuxwikila oitenda. Paulinu okwa ti okwa tameka tete kwa li ha longo kOndangwa kongeshefa yokuxwikila oule weedula nhee.

“Eshi kwa li handi ndi longo kOndangwa mongesha yokuxwikila onda kala nokulonga noudiinini opo ndi mone eshiivo lihapu nawa. Nokonima onda ka lombwela omuhona wange kutya inandi hala vali oku mu longela, shaashi onda mona kutya paife ondi na ounongo wa wana nokuninga ongeshefa yange mwene. Onghee onda dja ko opo ndi tote ongeshefa yange mOmaalala,” Paulinu ta ti.

 Paulinu oku li yoo ha yandje nomadeulo kovanafikola ava ve li kiiputudilo yopaungomba ngaashi opo va shiive ve lideule mongeshefa yaye kombinga yokuxwikila.

Paulinu okwa ti ovanyasha nava longife ounongo wavo opo va shiive oku limonena oshimaliwa nokweeta po oilonga moshilongo.

“Itashi ti kutya ngeenge omunhu wa dopa ile wa xulila meendodo dopedu ito dulu okuninga sha. Ovanyasha vakwetu otwa pumbwa oku litulamo moilonga youngomba shaashi ihai pula oulongelwe washa, ashike eshi sha pumbiwa ounongo nokulitula mo,” Paulinu ta ti.

Pexulilo okwa ti ouwa ihau monika nakapala kayela, onghee ngeenge omunhu owa hala u shi endife nawa moilonga yoye ou na okupita momashongo e lili noku lili.