ONGWEDIVA - Eshi ofela tai xweenene, ovakwashiwana vahapu, unene momalukanda, otava nangala inava kofa molwaoutalala.
Kristofina Salom, omunamido (49) ina younona vahamano, omukalimo womOshakati, oye umwe womovakwashiwana ovo tava nangala inava kofa molwaashi kave na omalukalwa e li nawa vo kave na omakumbafa noikutu youtalala.
Omukainhu ou okwa hokololela Kundana nghee ye nounona vaye tava mono oixuna koutalala notava fi oluhepo.
Salom okwa ninga efimbo a kanifa oilonga oyo a li ha longo ongaomukeleli womaliko. Ekanifo loilonga ole mu tula moluhepo lakula. Omukainhu ou nounona vaye, ove na ashike ekumbafa limwe olo aveshe have lituvike.
“Ohatu di moshipeleki hashi talala neenghono notu li mo hatu xupu shokadila kombinga yoikulya,” Salom ta ti.
Okwa tumbula yoo kutya oku na okanona kashona ka nyika ounghundi, oko xe ehe na nako nonande haka kala ka pumbwa eyambidido keshe efimbo. “Luhapu ngeenge hatu i koshipangelo tu ka konge nande oikulya yokaana yomanyutu ohatu lombwelwa ashike kutya oshipangelo kashi na oikulya,” Salom ta ti.
Okwa twikila ko kutya mobashu omu e li oku li mo ta hiila naluhapu ohe li hange ehe na oshimaliwa shohiila. “Omwedi ngeenge wa fi ohandi kala ashike nda lulilwa shaashi nghi na kutya ohandi hange oimaliwa peni yokufuta onduda. Efimbo limwe ohandi ka pula ekwafo moshiwana, ndele ovanhu navo paife ova loloka nge,” Salom ta weda po.
Ota pula ekwafo moshiwana opo shi mu vatele noilonga yoludi keshe, oikulya oshoyo oikutu.
Ngoloneya waShana Elia Irimari, pefimbo a li ta yandje omushangwahokololo woshitukulwa, okwa popya kutya oHarambee Prosperity otai kendabala i konge nokulundulula eenghalo dovanhu ve li memono loixuna moshitukulwa. “Otwa hala okuhangakena oluhepo, nepangelo ola nongela ekandulepo leemhumbwe dovakwanaluhepo vahapu da pumbwa di tulwe moilonga.
Irimari okwa popya yoo kutya ombelewa yOmupresidente, OOmupedpresidente, Omupilima oshoyo epangelo lopashitukulwa laShana ova yandja omayambidido oikulya komaumbo a fika po 1 344. “Omaumbo aeshe aa a pewa omayambidido oyaa ovakwanaluhepo,” Irimari ta ti.