WINDHOEK – Omupresidente omupeepeka gwoshilongo shedhina Republic of Congo Felix Antoine Tshisekedi, ngoka a kala a tegelelwa a talele po Namibia osho a thiki mEtiyali lyoshiwike shika.
Tshisekedi sho a thiki okwa lombwele Namibia kutya oshilongo shawo oshi li sha mona iihuna ethimbo ele ihe ota kambadhala shoka ta vulu okuhwepopaleka onkalo ndjoka.
Ndhika okwe dhi popi kegumbo lyepangelo moshilandopangelo moka a hokolola kutya olweendo olo kuya ashike okwiihokolola komwayina miilonga omupresidente Hage Geingob.
Okwa ti kutya oshilongo shawo ngashingeyi otaya tula po nduno omaziminathano opo a vule we okukondolola oombelewa ndhoka dhi li natango miikaha yomuleli ngoka a li ko nale Josef Kabila.
Shika osha holoka sho omupresidente gwaNamibia Hage Geingob a gandja ehiyo lyetalelopo komupresitende nguka opo a hogololwa moshilongo shawo, ehiyo okwe li gandjele sho ya tsakanene komutumba gwiigwana yahangana ngoka gwa ningilwa KoAddis Ababa ehulilyoshiwike lya zi ko.
Sho Geingob a yi moonkundathana dhopasheendelela naTshisekedi oya kundathana kombinga yehumokomesho muupolitika moshilongo shoka DRC mwa kwatelwa nkene SADC ta kwathele oshilongo shika unene mombili, uukalinawa noshowo ehumokomeho.
Omupresidente Geingob okwa hokolola kutya itashi ti kutya ngele okwe ya omupresidente omupe mboka aakulu ngele oya lela kasha li pauyuuki otaya ka pangulwa.
Okwa hokolola woo kutya Tshisekedi okwe ya ashike opo a iyulike kuye ihe ine ya nolweendo lwopambelewa ngaashi shili onkalo ndjigilile komitse dhoshilongo sho tadhi talele po Namibia aluhe.