Uuministeli womindhingoloko omakuti nomapashiyono owa tseyitha kutya oompanda dhili 28 odha dhipagwa shaali pa veta, muule woomwendhi ashike ndatu.

Uuyelele mboka owa gandjwa sho oompanda dhi li 19 dha li dha itsuwa mEtosha dha dhipagwa nomugoyi dha dhipagwa koofalama dhopaumwene.

 Omupopiliko muuministeli womindhingoloko, omakuti nomapashiyono, Romeo Muyunda okwa ti, nonando iiningwanima mbika oya li tayi shuna pevi, omimvo mbali dha piti oya ende tayi londo ishewe.

Ta ti, omwaalu ngoka ogundji noonkonkondo, moomwedhi ashike ndhoka dha piti, netokolo lyomeendelelo okugamena oompanda otali ka ningwa.

“Omumvo nguka inagu thika nopokati ihe ompanda 28 odha dhipagwa. Omuyalu nguka ogu li nale metata lyomwaalu gwoompanda dha dhipagwa omimvo dha piti,. Mo2021 oompanda dha dhipagwa kaashi li paveta odha li 43, oshowo 40 mo2020. Ta gwedha po ta ti, uuministeli womidhingoloko, melongelokumwe nopolisi, etanga lyegameno oshowo aakwatheli yalwe, otaya ka nkondopeka etulo miilonga lyoveta yegamenenopo lyiiyamakuti, opo uupyakadhi mbuka wu hule po.

Ta ti, nuumvo inaku lopotwa nando ondjamba yimwe ya dhipagwa kaashi li paveta.

“Momumvo 2017 oondjamba dhi li 50 okwa li dha dhipagwa, 2018 odha li 27, 2019 odha li 13, 2020 odha li 12 omanga 2021 dhali hetatu,’’ Muyunda ta totha mo ngaaka.

Ta ti, omwaalu ngoka otagu ulike lela gwa shonopala omimvo dha piti, naashoka otashi ulike nkene aagameni yiiyamakuti ya kala taya longo ya itula mo, onkene otaya tula miilonga omikalo
dhoka, ya kala noku longitha omimvo dha piti. Muyunda okwa li a kumagidha oshigwana shi hulithe po okudhipaga iiyamakuti ya gamenwa mEtosha.

“Iiyamakuti ngaashi oompanda, oondjamba oshowo oongaka ooyi li moshiponga oshoka oyo unene hayi dhipagwa omolwongushu yiilyo yawo,” ta ti ngaaka.

Ta ti, nonande ope na egameno lya kwata miiti okukeelela iiyamakuti yi dhipagwe kaashi li paveta, natango oshigwana ohashi kambadhala okulongitha oompito adhihe, okukonda ooveta ndhoka.

Sha ikolelela kiikundaneki yilwe, omutamanekindjayi Martha Imalwa okwa po pile kutya iikoya kombinga yiiyamakuti moNamibia oya kala yi li pombanda noonkondo noshinima shoka oshe eta eikwato pomutima kombinga yegameno lyuutshitwe woshilongo oshowo eyonagulo lyomidhingoloko.

- vkaapanda@nepc.com.na