Uuministeli womindhingoloko iihwa nomapashiyono owa pititha omushangwa kutya owa longitha oshimaliwa shi thike poomilliona N$24.1 okufuta ekanitho lyoomwenyo oshowo omayonagulo niiponga ya etithwa kiiyamakuti moshilongo.

Omugandji gomauyelele muuministeli womindhingoloko Romeo Muyunda okwa popi ta ti, owa longitha oomilliona N$24.1 okuza ashike momumvo 2019 sigo onuumvo.

“Momumvo 2022 oomwenyo dhaantu dhi li 15 odha faalelwa kiiyamukuti omanga mo2023 dhi li mbali dha kana omolwiiyamukuti. Aantu ye li 54 oya ehamekwa nokumona iiponga,” ta ti ngaaka,

Ta ti, muule woomvula dhoka uuministeli owa futu oshimaliwa shi thike N$2 963 852 shiimuna ya lika po kiiyamakuti, oshowo oshimaliwa shi thike N$2 569 200 shomapya ga yonagulwa kiiyamakuti.

Ta gwedha po ta ti, natango uuministeli owa longitha oshimaliwa shi thike N$640 000 okufuta iiponga ya ningilwa aantu oshowo oshimaliwa shi thike poomilliona N$3 shoomwenyo dhaantu ya dhipagwa kiiyamakuti.

“Natango oshimaliwa shi thike N$14 695 110,00 osha li sha futwa komahala ga gamenwa ga yooloka omolwuupyakadhi hau etwa kiiyamakuti,” Muyunda ta ti ngaaka.

Ta gwedhwa po ta ti, okuza 2019 oohekita dhi thike 2 637 dhomapya odha halakanithwa kiiyamukuti, uunene koondjamba, omanga okuza pokati komimvo 2022 no2023 oohekita 330 odha li dha hanagulwapo.

Muyunda ta ti, iimuna yi li 862 oya lika po kiiyamakuti okuza 2022 sigo 2023.

“Uupyakadhi wekanitho lyoomwenyo oshowo ehanagulepo nemonitho lyiiponga kiiyamakuti onkene tau tsikile. Shoka hashi tula oonkalamwenyo dhaakwashigwana moshiponga,” ta ti ngaaka.

Iinamwenyo yilwe mbyoka ya dhipaga wo aantu moomvula ndhoka oyo oondjambameya, oonyati, oondjamba, oonkoshi oshowo oongandu.

Muyunda okwa ti uuministeli wawo ou shi kutya omaidhengomumwe pokati kaantu niinamwenyo oga kala po okuza nale, ihe oshidhigu oku ga hulitha po thiluthilu. Ihe otapu vulu ngaa okuningwa sha ga shune pevi oshowo ga hule po.

Okwa ti oshinima shika ohashi holoka po unene uuna iiyaamakuti ya zi mo momahala gawo ga gamenwa, noku ka yonagula  iinima ngaashi oondama dhomeya, okuteya po omagumbo, okulya po iilya momapya nokudhipaga aantu.

“Uupyakadhi mbuka otau vulu okushunwa pevi pakweeta po omikalo dhekondololo  ewanawa lyiiyamakuti, ngashi pakukutha mo iinamwenyo mbyoka tayi piyaganeke aantu momakuti ga gamenwa, ngaashi twa kala nokuninga okuza omimvo dha piti,” ta ti ngaaka.

Uuministeli womidhingoloko iihwa nomapashiyono owa li wa eta po omulandu gu na sha nokuungaunga nomaidhengomumwe pokati kaantu niiyamakutu. -vkaapanda@nepc.com.na