Oshitopolwa shaShana onkene tashi tsikile okulongela aakalimo yawo uuwanawa okuxwaxwameka uuyogoki oshowo okuyanda omikithi hadhi ziilile moongaga. 

Ehala ngele kali na omahala gokwiikwathela uuna uushitwe tau ithana, oshigwana ohashi longitha ashike kehe mpoka shi li okwiiwathela shoka hashi vulu okutaandeleka omikithi oshowo okukakeka oshitopolwa. 

Ngoloneya gwoshitopolwa shaShana Elia Irimari, ota ti ehala ngele olya kaka kape na ngoka ta hala okukala po, nuuna oshitopolwa itashi hokitha nosha kaka kape na ngoka ta hala oku shi humitha komeho okupitila momikalo dha yooloka ngaashi okweeta mo oongeshefa. “Sho osho shoka oshitopolwa shika shaShana sha hala uuyogoki owo wu kale wu li komeho nowa simanekwa,” ta popi ngaaka. Oshitopolwa shaShana metengenekothaneko lyonuumvo, osha longekidha oomilliona N$2.1 oku ka tungila oshigwana uundjugo wu li 130 miitopolwa ya yooloka. 

Metengenekothaneko lyomumvo 2021/2022 uundjugo wu li 70 owa li wa tungwa miikandjohogololo ya yooloka moShana, koshimaliwa shi thike pomilliona N$1.1. Omuthaneki gwiinyangadhalwa yoshitopolwa shaShana Jekonia Nangolo okwa popi kutya, kohi yetengenekothaneko lyuuyogoki momindhingoloko dhokuushayi, Ongwediva Rural Development Centre okwa li ya tothwa mo ya pewa otendela yokutunga uundjugo. “Uundjugo otau ka tungwa miikandjohogololo 11, moka oshikandjohoglolo shaKaku tashi ka tungilwa uundjugo 20, omanga Okatana taka ka tungilwa uundjugo wu li 16,’’ ta ti ngaaka. Ta gwedha ko kutya omolwomwaalu gwaantu ngoka tagu ende tagu indjipala moondoolopa Ongwediva nOndangwa namo otamu ka tungwa uundjugo wu li 15 kehe mondoolopa. 

“Uundjungo wu li 13 otau ka tungwa moshikandjohogololo shUukwiyuushona omanga wu li 11 tau ka tungwa momundhingoloko Oshakati gshokuuzilo,’’ ta ti ngaaka. Ondangwa Urban, Uuvudhiya, Oshakati shokuuninginino, Okatyali oshowo Ompundja otayi ka tungilwa uundjugo uhetatu kehe moshikandjohogololo.Uundjugo mboka otau ka tungilwa oshigwana ihe itau ka tungilwa oohandimwe. 

Oombelewa oonene odha ti, otadhi tsikile okugwanithapo ayihe ya li ya uvanekwa momatengenekothaneko. Oshigwana osha londodhwa wo shi kwate nawa uundjugo mboka tau ka tungwa, oku wu kaleka po, opo wo natango wu longithwe monakuyiwa. vkaapanda@nepc.com.na