OMUTHIYA - Pethimbo minista gwomayambulepo goondoolopa nomahala gokuushamba, Erastus Uutoni kwa li ta gadja omagumbo pambelewa, okwa kumagidha omahangano gaatungi yomagumbo ga shonopaleke shoka hashi ningitha omagumbo ondilo.
Ehangano lyokutunga omagumbo National Housing Enterprise (NHE) oshiwike shika olya gandja omagumbo 50 kOmuthiya Omaandaha, 24 kOndangwa mEtiyali naangoka taga ka gandjwa ngula ge li 70.
“Iinima yimwe yomeni mboka tayi vulu okuya okutulwa mo kumwene gwegumbo, ningeni hamu yi thigi ko, opo ondando yegumbo yi nengene, naantu ya vule okulanda omagumbo,” Uutoni ta kumagidha ngaaka.
Okwa popi kutya ondando yi li pombanda oyo yimwe yomomatompelo omanene oshigwana itaashi landa omagumbo.
“Uuministeli otau tsikile okuyambidhidha omalelo goondoolopa, nooproyeka tadhi tungile oshigwana omagumbo. Uuministeli owa li wa longekidha oomiliona odhindji okuyambidhidha ooproyeka ndhoka, omolwiilonga iiwanawa tadhi longele oshigwana,’’ ta ti ngaaka.
Ta ti ngele ito kutha ombinga mooproyeka ndhoka mbali, to kala po, ngoye wu kale inoo mona olukalwa lwoye mwene lwaaluhe.
Uutoni okwa kumagidha natango oshigwana shoka tashi ka pewa omahala gawo opo shi longe nuundhiginini okumana okutunga omagumbo gawo pethimbo.
“Otatu pandula ooproyeka dhokutungila oshigwana omagumbo, oshoka shoka tadhi longo, osha simana nosha lundulula oonkalamwenyo dhoyendji,” ta pandula ngaaka.
Minista okwa li wo a holola euvonawa lye, sho komwaalu gwaantu yaa na omagumbo kwa zi.
“Olukalwa oshinima sha simana, nakehe gumwe okwa pumbwa egumbo lye mwene. Onkalo yokambashu oya pumbwa okuhula, ihe shoka otashi ningwa ashike ngele tamu longo nuudhiginini,” ta popi ngaaka. Omukuluntu gwehangano NHE Gisbertus Mukulu okwa ti oye na ohokwe yokuyambidhidha oshigwana opo shi kale tashi zi momahala ge na oyuugoki okuyanda uupyakadhi tau vulu okutula oshigwana muupyakadhi uuna itaya zi momagumbo ge li nawa,” ta ti ngaaka.
“NHE okulile po oshigwana opo shi mone omagumbo kondando tayi vulika koyendji,” ta ti ngaaka. Ehangano lyokutunga omagumbo omumvo gwa yi okwa li lya pula oshigwana shi ninge omaindilo gokulanda omagumbo moondoolopa dhi li ne moshilongo.
Ta ti omagumbo ngoka oga tungwa ge li pamaludhi goondunda mbali nenge ndatu dhokulala, sha ikwatelela kuunene wegumbo ndyoka omulandi a hala.
“Omagumbo oge na oondando okuza N$394 365 sigo N$500 000, sha ikolelela kongushu yegumbo ndyoka omulandi a hala,’’ ta fatulula ngaaka.
Ta ti ehangano otali landitha omagumbo ngoka, ongoshinakugwaitha shehangano lyo-NHE okugandja omagumbo moshigwana.
vkaapanda@nepc.com.na