BUKALO – Likwambuyu walikolo la zwelopili ya libaka zalitolopo ni matakanyani Erastus Uutoni, ukupile baeteleli balitolopo kuambuka kuitwanisa nikundongwama kutisa zwelopili. Uutoni naize kuitwanisa kulyehisa zwelopili ili kalulo yetima sicaba liswanelo zasona. Uutoni nabulela kanako yakutambeka mubu wakuyahela mandu alikana 162 kwa katengo kamunzi wa Bukalo.

“Kwa baeteleli ba Bukalo mubonahalile kuitulela feela kwalineku la zwelopili kanako yetelele. Libaka kilifi? Kiñi hakusina zwelopili? Kuitwanisa, mwaziba cwalo, bashemi babalateha, mizwale, likezeli, limembala balubasi babalateha, kiñi haluna ni kuitwanisa?’’ nekubuzize Uutoni. Likwambuyu na amuhezi kuyahiwa kwamandu mi naize kimuhato sakata mwakuhulisa munzi wa Bukalo.

Nakupile muyahi wamandu kubona kuli utalima batu babasaholi hahulu. “Luziba kuli bayahi kamita babata masheleñi kapilipili, mi batalima feela baale babafumana lituwelo zekotokile ni kulibala babafumana lituwelo zekutezi fafasi. Seni kupa kisakuli hamutaha kuto zwisezapili sibaka muhupule bale babafumana lituwelo ze inyani. Hamuyaha mandu mubone kuli mutalima nibale babafuma lituwelo zekutezi fafasi,” nekubulezi Uutoni.

Mubusisi wasikiliti sa Zambezi Lawrence Sampofu nakupile kampani kuyaha mandu sakata aka itumelwa kibaleki. “Lumikupa kuli muyahe mandu atiile, ili kuli baleki baitumele kuli habasika sinyehelwa masheleñi. Luboni mandu ayahilwe, kasamulaho alikweli zetalu lika zakala kushwa. Lubata kubona kuli mandu afela. Luboni bayahi babañwi bane basiyezi mandu fahali, halulati zeo lubata kuli mandu afele,” nekubulezi Sampofu.

Mandu aka yahiwa kikampani ya Oasis Learning & Haamco Investment ili yene sepisize kubona kuli bayahi ba Bukalo bafumana misebezi. Kampani hape nesepisize kukutiseza sicaba kakuyaha libapalelo la lipapali mahala, ni muyaho wakuezeza mikopano ya sicaba.