Omahekeleko omolwa eso lyomupresidente eli koshipundi gwaNamibia otaga zi koombinga noombinga dhuuyuni, unene muAfrica moka aapresidente yiilongo yilwe ya nyola komapandja gawo gokomalungula oku holola oluhodhi lwawo nuukwao wanankali pamwe nAanamibia. 

Omupresidente Geingob okwa hulitha okupendukila ohela mepipi lyomimvo 82. 

Yamwe yomwaamboka ya nyola tango, oyo omupresidente gwaSouth Africa Cyril Ramaphosa ngoka ta ti oshilongo she oshi uvite oluhodhi pamwe naNamibia. 

“Ondi uvite oluhodhi noonkondo. Opo owala ndali naye muKotoba 2023 sho Omupresidente Geingob, omunyekadhi gwe meme Geingos ya li ya taamba ndje, sho ndali nda talele po Namibia shina sha niilonga. Pethimbo lyetalelepo otwali twa tsu kumwe opo iilongo yetu yi pange uukuume watsa kekipa omolwa onakwiiwa nokalonawa yiigwana yetu…” Ramaphosa ta nyola.

Omupresidente waKenya William Ruto, naye wo okwa holola oluhodhi lwe kepandja lye lyokoTwitter, nokwa gandja omahekeleko kofamili yaGeingob nokoshigwana ashihe.

“Presidente Geingob oye gumwe a lele oshigwana she nondjungu noneitulomo. Okwali a itula mo moku hanganitha Africa, nokwa kala nokufala enenevi kuuyuni noku sa oshimpwiyu kutya Africa oli wetike. Omuwa nakumike noku hekeleka oshigwana ashihe shaNamibia,” Ruto ta ti.

Omupresidente Julius Bio gwaSierra Leone ye okwa hokolola omupresidente Geingob onga “omuyapostli” wepangelo lyopauyuki. 

“Aanamibia hekelekweni kuumbangi wiilonga iiwanana nondjokonona ndjoka ombwanawa tayi thigwa po komupresidente gwani. Okwa kala gumwe gwomaaleli Aafrica aawanawa,” Bio naye osho a nyola kepandja lye lyokoTwitter.