ONGWEDIVA - Omukulupe weedula 70 ota hokolola ta ti ota tekula ovatekulu ovo a etelwa kooxe ndele tava faduka po.
Ounona aveshe ava vaheyali nande va dalwa kOvanamibia, kave na eembapila doufemba womoshilongo.
“Ounona aveshe ova dalwa kovamati vange. Paife ngaha eedula nhatu ooxe inava enda ko keumbo,” ta ti.
Dina Joseph omukalimo womukunda Omatunda moshitukulwa shaHangwena okwa hokolola ta ti ovatekulu vane ohava i kofikola omanga vatatu ihava i kofikola, ashike ohava xupu moshimaliwa shaye shopendjela.
“Ihandi xupu po nasha ngeenge nda kwata opendjela molwaashi ohandi landele ovatekulu vange oidjalomwa, oikulya noikwafifo yofikola,” ta ti.
Joseph okwa ti oku na yoo vali omonamati weedula 32 e ne oudu wopamadilaadilo ndele naye ke na omaufemba oshilongo.
“Ohandi xupu noudjuu. Paife onda kwatwa kohonde ya londa, efimbo keshe ohandi lili handi lipula kutya ovanamati vange ove li peni. Onghee kashipu okutekula ounona vaheyeli nomunhu e na oudu wopamadilaadilo tava xupu mokamaliwa kopendjela,” ta ti.
Oshivike sha dja ko Kundana okwa shakeneka omukulupe ou komaulikilo oipindi aHelao Nafidi, omo kwa li e uya okukongela ovatekulu vaye omaufemba noshoyo omonamati.
Okwa hokolola ta ti okwa enda oshinano shile novatekulu vaye nomonamati va pita ongula inene va ka konga omaufemba ashike inava kwafelwa.
Joseph okwa kala e li momukweyo efimbo lile shaashi ovanhu okwa li va ngudumana momwaalu muhapu tava kongo omaufemba.
Ovanafikola va dja keefikola da yooloka navo okwa li va holoka tava kongo oumutwe needjapo domadalo.
Joseph okwa ti okwa li ta kongo ekwafo opo a tule ovatekulu kedina laye ashike ovanambelewa hava longo meembelewa dokuyandja omaufemba ina hala.
“Onda lombwelwa kutya inandi ka konge ooxe younona. Ovanambelewa ova ti ihashi dulu okutula okaana kedina lange omanga ke na ovadali vako ve li momwenyo. Onda tameka handi kwena komesho yovanambelewa handi pula ekwafo ashike kemanya ku dja ondwi,” ta ti.
Joseph okwa ti ke shi ngeenge ooxe younona ove li momwenyo ile ova fya shaashi ihava ende ko keumbo.
“Ame onda etelwa ashike ounona. Umwe womonamati wange okwa lombwela nge ta ti okwa etela nge ounona vaye vane shaashi ova xulifa po ekwatafano lopaihole yomukainhu waye. Okudja opo fiyo onena inandi mu mona,” omukulupe ta hokolola.
Okwa ti ota hepekwa komadiladilo te lipula kutya ngeenge okwa xulifa olyelye ta ka tekula outekulu vaye.
Okwa ti okwa li okuninga eenghendabala nokutuma omatumwalaka moradio ta kongo ooxe nooina younona ashike kave wetike.
“Efiku olo omonamati wange ou e na oudu wopamadilaadilo naye ina pewa odjapo yedalo shaashi ke na okakalata keshasho,” ta ti.
Joseph okwa ti ota indile kepangelo opo li yandje eedjapo domadalo kovatekulu vaye opo va kale tava kwata oshimaliwa shopendjela osho hashi pewa ounona voukwanaluhepo.
Okwa weda po ta ti omonamati waye naye okwa pumbwa ekwafo loshimaliwa shopendjela molwaashi oku li kepango.
“Ohandi longifa oshimaliwa ngeenge handi ka tala omiti daye koshipangelo shaashi osha nyika oshiponga ngeenge omunhu e na oudu wopamadilaadilo ina nwa omiti daye,” ta ti.
Omukulupe ota indile moshiwana opo shi mu yambidide noikulya, oikumbafa noshoyo oidjalomwa yovatekulu vaye.
Eshi a kwatafana naKundana, omupopiliko wouministeli woikwameni neameno lokeengamba Aina Simon okwa yelifa ta ti kape na omunhu a pitikwa a shangife ounona kedina laye omanga ovadali vavo ve li momwenyo.
Onghee okwa ti ope na omilandu hadi landulwa tete shaashi ngeenge ovadali vounona ove li momwenyo otashi ka eta va ka pule kutya omolwashike ounona vavo va tulwa kedina lomunhu umwepo.
Simon okwa ti omukulupe okwa pumbwa a ye keembelewa doukashikekookanhu nonghalonawa yokaana opo di mu kwafele okukonga ovadali vounona.
“Okudja opo ngeenge ovanambelewa voukashikekookanhu ova nyengwa okukonga ovadali vounona otave tu shangele ombapila nokudja opo omukulupe ou ota pitikwa a shangife ounona kedina laye,” ta ti.