Opolifi oya lopotelwa omafyo ovanhu va fika po11 va kanifila eemwenyo davo moiningwanima ya yooloka mexuliloshivike.
William Jonh Titus omukalimo waRehoboth moshitukulwa shaHardap, okwa lopotwa a xulifila popepi noJane Store Block B, konima eshi vati a dengwa noshipilangi komutwe.
Titus vati okwa li ta tanguna nomufekelwa, nokonima eshi va didilikwa va fufaeka, omufekelwa okwa kufa oshipilangi nokudenga Titus komutwe, ndele ta xulifile poshiningwanima.
Olutu lanakufya vati ole lituwa komunambelwa wopolifi pefimbo va li tava patolola. Omunambelewa vati okwa hanga ashike olutu la kangavala pomunghulo wopate li na omutwe wa tyanghaulwa li li pomhunghulo wopate.
Omufeekelwa weedula 22 vati okwa tulwa moipandeko, nomakonaakono opolifi otaa twikile. Moshiningwanima shikwao opolifi oya lopotelwa efyo laNatanael Tangeni Nghiyalwa. Olutu laNghiyalwa vati ole lituwa monduda yaye yokunangala, li na oipute yeeholo. Monduda yaNghiyalwa vati omwa hangika yoo eeholo dondjebo di li pedu. Ovafe]ekelwa vati kave shiivike fiyo opapa, ashike vati opolifi otai fekele vamwe vomovaneumbo, shi na sha nefyo laNghiyalwa. Albertus Domingo omunamido 29 okwa lopotwa a dipawa komufekelwa weedula 23 moTsumeb moshitukulwa shaShikoto. Domingo okwa dipawa molwaashi vati a tuka omufekelwa, ndele te mu ponokele noshilwifo sha honga molwehandu. Domingo vati okwa tuwa oikando ya fika puine monhulo. Vati okwa xulifila koshipangelo pefimbo a li ta ungaungwa naye kovapangi.
Manga olwoodi inali tameka efiku olo, Domingo nakaume kaye vati ova li tava nu pamwe ve udite ombili opamwe yoo nookaume vavo vamwe vali. Moshitukulwa shaKavango West omwa lopotwa kaadona keedula 20 Ndjamba Sara Nerumbu, a xulifila moshiponga shokashelu momukunda Bunya.
Nerumbu vati okwa li ta ende ta di ketambi lomeva a finda keumbo voo namumwaina, koo okashelu vati oke mu hanga a humbata evela lomeva komutwe. Nakufya vati okwa fiya ko ohanana yoshivike shimwe.
Brian Katjimune omukalimo waKahandja moshitukulwa shOtjozondjupa okwa lopotwa a xulifa konima eshi a pondwa kombelela poKapana Spot moNau-A ib.
Katjimune vati ova li va ka lya okapana Olomakaya nokamonamati oshoyo mumwaina pOkapana spot, ndele ta pondelwa po kombelela ei ye mu twala mefyo. Ovapambele voonakufya aveshe ova shiivifilwa, nomakonakono opolifi otaa pula komesho.
MoMondesa moSwakopmund omwa lopotwa okaana naina va fila moshiponga shomundilo, konima eshi onduda yavo ya kwata omundilo. Opolifi oya ti otai fekele oonakufya va li tava teleke, ndele tava kofa manga ombiya ya li tai pi. Vati fiyo opapa kave shiivike komadina, nomalutu avo okwa twalwa kokila yoshipangelo shepangelo shaSwakopmund.
Ovapambele kave shiivike, ashike opolifi otai ningi omalongekido nomapekapeeko omeendelelelo opo ovapambele va monike nokushiivifilwa. Moiningwanioma ikwao opolifi oya lopotelwa efyo laIiyambo, omulumenhu weedula 31, a hangika e limangeleka momuti needalate.
Nakufya vati ina fiya po nande oyo onhumwafo ile ouyele tau hokolola oshietifi shefyo laye. Opolifi natango oya lopotelwa efyo lomakainhu weedula 54 e limangeleka moshipangelo shaOutapi moshitukulwa shaMusati. Nelago Amwaalwa vati okwe limangeleka nomwiya wokandjato kaye kopeke. Amwaala vati okwa li a twalwa koshipangelo momafiku 09 Novemba 2023 eshi ovaneumbo vaye va didilika eemhepo domalimangeleko muye.
Vati koshipangelo okwa li a twalwa ko a kale e li momake ovaxungimwenyo ngeno.