Moshiningwanima shitilifa, omulumenhu weedula 24 okwa xwika po eenduda nhee meumbo lavo nokonima okwe limangeleka.
Oshiningwanima eshi osha ningwa momukunda Outwilo moshitukulwa shaHangwena.
David Shikonda ha di meumbo la ningilwa omunyonena womundilo, okwa hokolola ta ti monduda imwe omwa pila oikutu aishe yaxe oo e li mwene weumbo. Shikonda okwa ti fiyo opapa kape na ouyelele tau yandje etomhelo kutya omolwashike omukwapata wavo a xwika po eumbo. Nakufya okwa tongololwa oye Erickson Trivanus. Kakele koshiningwanima shokOutwilo, ovaneummbo momaumbo ane mOshana noshoyo mOshikoto ova fiwa tava lili ondjala, noluhepo loidjalomwa nomakumbafa voo tava nangala pongalangala eshi ondalu yaNelyanga ya hanauna po omaumbo avo.
Moshiningwanima shotete omomo omukulupe weedula 65 pamwe novaneumbo vaye 12 va pilwa eumbo lavo alishe vati la xwikwa po kounona kwa li tava danene okapalwa.
Oshiningwanima osha ningwa komukunda Uuthikilo moshitukulwa shaShana.
Mexuliloshivike moshikandjohoololo Uukwiyuushona omwa lopotwa oiponga ivali yomaumbo a pya po omanga komukunda Outwilo okwa lopotwa eumbo la pya eenduda nee.
Oshivike sha dja ko omunafikola weedula 20, okwa fiwa pomutenya konima eshi obashu yaye ya pya po filufilu komukunda Onamulunga moshitukulwa shaShikoto. Omukainhu weedula 52, Ester Angombe okwa kanifa omaliko aye ayeshe konima eshi omutekulu waye kwa li a tema okapalwa fiyo omundilo tau hake eenduda. Oshiningwanima osha ningwa momukunda Oshaanawa moshitukulwa shaShana efimbo lokonguloshi. Angombe okwa ti omaanda oilya okwa pya po ayeshe ashike meumbo omwa xupa onduda yoshipeleki shimwe osho kwa li shi li kokule neenduda da pya po. Opolifi onghee nga tai twikile nokukumaida ovadali opo vaha tule vali oupalwa poluhaela opo ku kelelwe ounona vaha danena okapalwa.
Ovadali ova kumaidwa opo va popye nounona vavo nghene omundilo wa nyika oshiponga.