Ovalumenhu ve li vane hava longo onga ovaliyambi vokutaulukifa ounona vofikola pofikola Akuniihole Primary School ova pewa eembasikeae, oikutu yokudjala, nomambale ngeenge tava longo mopate mokukwafela ovanafikola okutauluka opate ku-MVA Fund Omaandaxa.
Ovalumenhu ohava longo mengudu yokulwifa oimbuluma yoMen and Women network yo pomudingonoko waKuniihole.
Ova kala tava kwafele ounona vopofikola puAkuniihole ngeenge tava i ile tava di kofikola efimbo keshe.
Okwa didilikwa ovalumenhu ava ova longo oshilonga sha fimana shaashi otava lalakanene okuxupifa eemwenyo dounona vofikola.
Ovakwashiwana vali koshikonga eshi ova hongela oshimaliwa shi fike N$10150 opo shi kale sha pewa ovalumenhu hava kwafele oku tau lukifa ovanafikola opate.
Oshimaliwa eshi osha hongelwa ashike pefimbo opo ovanhu eshi kwa li vahongala pofikola Akuniihola.
Pefimbo ta yandje eembasikela omukulunhu koshikondo shokulela oiponga moMVA fund Sidney Boois okwa popya ta ti ehangano loMVA fund ola pandula unene ovalumenhu ava eshi tava longa onga ovaliyambi okukwafela ounona vofikola ngeenge tava tau luka opate.
Okwan ti MVA fund ota twikile nokukala ta yambidida ovalumenhu ava shaashi ova kale nokulonga efimbo lile hava penduka ongula opo va ye kopate va ka kwafele ounona vofikola oku tau luka opate.
Boois okwa kungulila ovakwashiwana keenhele da yooloka domoshilongo opo va ku fe ko oshihopaenenwa kovalumenhu ava, vo va dule navo okukala tava kwafela ovanafikola ile ovakulupe oku tau luka opate momidingonoko davo.
Okwe valombwela ta ti eembasikela edi va pewa ota di kala ta di longifwa ngeenge tave u ya kopate ile tava shuna komaumbo.
Nandonga Mathew oye umwe womukulunhu wa vakwao have liyambe okukwafela ounona vofikola oku tau luka opate, okwa lombwela Kundana Omandaxa ta ti ova kala hava longa onga ova liyambi okutameka ketameko lomudo ou, omo va kala hava penduka ongula opo va ye popate ya ende puAkuniihole va ka yambidide oyembudangele oku tau luka opate.
Mathew okwa popya ta ti ova pandula unene MVA fund eshi eva yambidida neembasikela shaashi paife itava kala vali tava ende endjiladiledile kolupadi.
“Otuna okutwikila nokuyambidida ounona vofikola ngeenge tava tau luka opate osheshi ounona ova fimana,” Mathew ta ti.