Opolifi moshitukulwa shaShana oi li mokashoko komulumenhu weedula 34 oo va ti okwa xwika po otuwa yomumwaina ndele ta faduka po. 

Oshiningwanima eshi osha ningwa Etivali, mokati koufiku lwopotundi 00h00, momukunda Omatunda moshitukulwa shaShana. 

Omupopiliko wopolifi moshitukulwa shaShana Inspector Thomas Aiyambo okwa ta ti mwene wotuwa okwa ya keendingosho ndi li pomukunda wavo, ashike moku aluka ko okwa hanga otuwa yaye i li nomufekelwa ou e li mumwaina. 

Okudja opo mwene wotuwa okwa pula omufekelwa opo e mu twale keumbo notuwa yaye. Opolifi oya hokolola tai ti manga ve li mondjia yoku ya keumbo ova ende tava tanguna, omufekelwa okwa tameka okuningila mwene wotuwa omatilifo e kwete ombele kutya ote mu dipaa. Va ti omufekelwa okwa ti ota xwike po otuwa ya mumwaina shaashi va ti okuhole oinima yaye. Opolifi oya hokolola tai ti okudja opo mwene wotuwa okwa dja mo motuwa noku faduka po molwashi okwa li a kufilwa ombele. 

Okudja opo omufekelwa okwa shinga a shuna keendingosho. Ota ku hokololwa kutya manga mwene wotuwa a kofa okwa unda oshinima tashi pi. Moku penduka okwa mona otuwa yaye tai pi. Okwa pendula ovaneumbo va yambidide okudima omundilo kotuwa, ashike otuwa oya hangwa nale ya pya neenghono. 

Otuwa oToyota yongushu yoshimaliwa N$60 000-00 

Fiyo opapa ka pena ouyelele kutya omufekelwa oku li peni onghee opolifi otai indile moshiwana opo shi yandje ouyelele. fhamalwa@nepc.com.na