Ovakwanedimo vomupolifi a xulifile moshiponga shotuwa muKotoba 2022 mOvenduka, ova tokola okutwalwa opolifi komhangu omolwouhasha oo tava ti owa longifwa mekonaakono lomumwainamati.
Denis Mwilima Sinvula okwa xulifila koshipangelo shopaumwene moshilandopangelo, konima yeevili donhumba eshi otuwa yaye ye lidenga mumwe omutwe nomutwe noshihauto shikwao.
Omunamido 36, okwa li a hangwa ashike a mana omadeulo okuninga omupolifi womeendjila, nokwa djala enguwo efiku olo.
Owen Sinvula, omukulu waDennis okwa hokolola kutya, opolifi inai longa oilonga yayo shaashi oya dopa okuninga omakonaakono poshiponga osho sha lya mumwaina.
Ta ti opolifi inai patulula oshibofa, yo vali inai ninga omakonaakono ohonde ku talike ngeenge ovashingi ova li koshi yodungo nonande ponhele opo pa fila mumwainamati opa pitikwa ashike okushingwa 60km movili. Okati kotuwa oyo ye lidenga mumwe noyaDenis vati oka hangwa po120, omanga kotuwa yaDenis ka li po60.
Omushingi mukwao poshiponga okwa dja po ta ende, vati nomoshipangelo okwa lekelwa mo efiku olo tuu olo.
“Ondenge yange ame oya li oshilyo shongeleka yo 7thDay Adventist, kaya li hai makele nande olo elodu,” Owen ta yelifa.
“Ondi wete kutya nakuetifa oshiponga oyou a li ta shingilile, ta shingi nouhefi nokuhe na ko nasha,” Owen ta hokola.
Omishangwa domukonaakoni woibofa Hendjala Isreal Fikameni, oda holola kutya yee kakwa li ta dulu okuninga omakonaakono e na sha nelongifo lomaludu ile makwao a wedwa po, shaashi ovashingi aveshe ova li va mona oshiponga.
Olopota yaFikameni oya holola yoo kutya yee kakwa li ta dulu okuya noshipofa komesho, shaashi ovanashilongo voshikondo shomayakulo opaulumomhumbwe ovo va fika po poshiponga tete.
“Eshi shi nyemateka osheshi kutya, ondenge yange ame oya hangika ya djala enguwo Etitano olo ya mona oshiponga, nokwa li ta ka tameka etemo koshikondo shomeendjila mOmaandaha. Etitano olo okwa li ashike a twala omudjalo mupe wakaume kaye oo naye a djala enguwo efiku olo. Mokushuna kwaye keumbo okwa mona oshiponga osho,” Owen ta ti.
Kakele kokulwa ondede kovapolifi, vati fiyo onena omushingi wotuwa ikwao ina ninga nande onghendabala yokupopya nofamili yaOwen, a yandje ngoo nee nande ombili.
“Eshi twa paka Denis, otwa dengela omulumenhu oo, tuhe na nande owii ngeno tu mu shivifile ashike kutya mukwao ou va li naye moshiponga otwe mu paka. Ashike omanyamukulo oo e tu pa kwe tu udifa nai,” Owen ta ti.
Ta ti okwa shangela kakukutu komatanga opolisi Joseph Shikongo ombapila i na sha naashi shaningwa po, Shikongo vati okwa nyamukula kutya yee ina shiivifilwa oshiponga osho, nopefimbo loshiningwanima kali mo mombelewa.
Omupedupopiliko wopolifi moshitukulwa shaKhomas Raimbert Muronga okwa ti ngeenge kape na oshibofa sha putululwa fiyo onena, ovakwapata nava twale oupyakadi wavo kombelewa yomukulunhu wopolifi moKhomas va ka patule oshibofa. “Ngeenge inava kundwa ko nava alukileni kwaame fye tu tale eshi hatu ningi,” Muronga ta ti.
“Molwaashi fiyo onena kape na eshi sha ningwa po, yee nakufekelwa ou a etifa oshiponga oku li ashike moshiwana a manguluka manga fye hatu lilaana. Otwa tokola okutwala komhangu opolifi navakwao vamwe itatu va tumbula kondadalunde, shaashi otwa hala ouyuuki,” Owen ta ti.