Ovanangeshefa novakwashiwana moshitukulwa shaShikoto ova uda nai eshi onhele yoshivilo shefikudimbuluko lomapendafule ya lundululilwa koshilandopangelo.

Oshiwana osho sha li sha teelela efiku olo ngomunhu ta fukike, paife  otashi nyenyeta nosha indila ombelewa yomupresidende opo i talulule etokolo layo yo  i pitike efiku li dimbulukilwe mOmuthiya ngaashi kwa li sha tongwa tete. Elelo loodolopa yaMuthiya noshoyo elelo lopashitukulwa shaShikoto ola ninga omafiku tali tula oinima peenhele okulilongekidila edimbuluko lefiku lomapendafule nokutambula ko ovaenda modoolopa yavo. Ashike mboli eshi hasho vali.  Omunambelewawiliki mouministeli wouyelele nomakwatafano opaungomba Audrin Mathe okwa pitifa omukandapitifi tau yandje ouyelele kutya efiku lomapendafule ita ka dimbulikikwa vali modoolopa yaMuthiya. Mathe okwa ti etomenho lokulundulula efiku omolwomupresidende ta di koshilongo Cuba noku li oye omweenda a fimana ta ka kala mefiku ledimbuluko lomapendafule.

Loide Simon omukalimo wOmuthiya ota nyenyeta ta ti kashi li pauyuuki eshi epangelo la ninga omalunduluko okuninga omatokolo kutya efiku lomapendafule nali dimbulukiwe koWindhoek.

“Fye otwa hangika kwa li twe lilongekida okulandifa oilandifomwa yetu. Onda hangika nale nda tuma ongobe kofuka opo ndi dule okulandifa okapana kange. Onghee okwa li twa hafa eshi twa uda kutya neudo efiku lomapendafule otali dimbulukiwa modoolopa yetu,” Simon ta ti.

Maria Gabriel ha landifa oikulya yOshiwambo okwa ti okwa li e lilongekida okulonga oshimaliwa shihapu molwaashi odoolopa otai ka hada omwaalu wovanhu. “Otwa dengwa pomutima. Ei oyo omhito iwa kwa li tu na okulongifa tu longe oshimaliwa shihapu ashike paife epangelo ola tula po omalunduluko,” ta ti. Ngoloneya woshitukulwa shaShikoto Penda Ya Ndakolo okwa ti okwa tambula ko etomeno la yandjwa komupresidende Hage Geingob kutya efiku okudimbuluka omapendafule ola lundulukila koWindhoek. “Oshiwana nashi tambule ko ashike elombwelo la yandjwa komupresidende,” ta ti.

fhamalwa@nepc.com.na