• November 16th, 2018
Login / Register

Vaduni momukunda gwaOhangwena kavagwene mafano gosirongo


Nuusita Ashipala Ongwediva – Konyara vaduni wokusika konoperesenta 50% momukunda gwaOhangwena kavagwene mafano gosirongo mosiruwo esi vatulisapo asi vantu vagwana mafano kutunda tupu mokwedi kwaNsinano dogoro Kudumogona mvhura zeezi. Sinzi sawo moomu tupu twavadiva asi aw okapi avatungu pevango limwe tupu, nye kugwaneka mukunda ndi sirongo nasinye. Elikwamo eli kwakara asi kwagazarere kugava mafano kovantu wokusika ko 3500 vatungimo momukunda ava vakara asi awo kwato mafano gosirongo kutunda mwaNsinano. Elikwamo eli kwagava hena nombapira dovharerwa kovakeke ava vahampuruka kumwe nye novakurona vaduni vakara momukunda vahana yihepwa eyi. Elikwamo simpe kwalitamuinuna dogoro lyakasika nye kwava woruhepo vaduni vana kara asi awo ngesi modorongo monomuknda ngwendi Eenhana ntani Okongo. Murugani gakarerapo vantu ava, momukunda gwaOhangwena Tomas Puleinge katente asi egano eli kalikere lyomulyo unene, morwa siruwo nasinye vaduni kapi ava gwana mauwa aga aga tundu kepangero yimaliva yovakurupe aw okapi ava yigwana nampili yononsigwe nayo kapi ava yimono. Puleinge murugani momukunda ogu ana karerepo mberewa zaPresidentegona ogu sinka sendi kuna kara tupu asi sokufira ava ava pilire kugwanenamo mauwa. Mokugwedako simpe konombapira dosirongo, ava nye vana kara asi kuna pumbwa kuvatjanga vagwane yimaliva youkurupe ntani yoruhepo ndi nonsigwe nawo kavavatjenge wokutunda koministeli zakarerapo rudi vharwa nosinka sovanona. “ Yina kara nye asi kwato mambo gomawa ndi gekuma, vaduni simpe kavatente asi nombapira dawo ava vakara asi kodili kwadizonagura mvhura, ano vamwe dawo dazumbana morwa mokudirauka tunda evango zende evango”. Yimo ngoso ana kutanta Puleinge apa kafatwilire momunene asi yinke vana kurugana siruwo esi melikwamo eli. Mokukwama nye mwendi age Puleinge, morwa mukaro nye gwakara asi vaduni kapi avatungu pevango limwe tupu, udigu nye posiruwo simwe odive asi awo wosirongo musinke morwa posiruwo simwe awo kutunda moNamibia tavazi mosirongo sovamusinda vaAngola. Ntani vamwe kavawizire pevango lyokulitjangesera awo vana korwa, ano vamwe kuna kunyoka kuvarondeka mehauto asi vavatware oku vana kutjangesera, omu vana kutanta vene asi nzo zakahurako nsene varonda mehauto. Mokugwedako vamwe kavageve madina gopeke kapisi gaaga vavadiva, ano ava nye vakara asi yihepwa yawo yazumbana kapi vana kudiworoka asi Edina musinke galitjangesere. Puleinge kageve sinka sendi asi siruwo esi vana tulire elikwamo eli sisesu, morwa vamwe vahepa kuza konofarama mosirongo saAngola, siruwo esi sina kara asi somvhura zina kuroka.
New Era Reporter
2018-06-07 10:43:19 5 months ago

Be the first to post a comment...