Festus Hamalwa

Omupopiliko wopolifi moNamibia omupedu commissioner Kauna Shikwambi okwa ti ombelewa yaye olopotelwa oimbofa yovanhu vahapu ve li ninga ovapolifi voipupulu eshi hava kala tava tula ovanhu mokatoo.

Shikwambi okwa ti ombelewa yaye oya didilika ovanhu vamwe hava kala tava longifa edina lopolifi moinima ya nyika oumbudi eshi hava kala va djala oikutu yopolifi omanga vamwe hava kala ve na eetuwa doipupulu da fa dopolifi.

Okwa hokolola ta ti ovanhu vamwe ohava longifa yoo vali oukalata voilonga vo vapolifi eshi hava kala tava u likile oshiwana kutya vo ovapolifi vo shili.

Okwa ti momafiku 23 omwedi ou omukainhu umwe okwa nyekwa otuwa yaye kovalumenhu vatatu konima eshi va kanghameka otuwa yaye moWindhoek eshi ve mu tula mokatoo kutya vo ovanambelewa vopolifi va djala oikutu yopolifi, vo okwa li tava longifa otuwa yopolifi yoipupulu.

Shikwambi okwa ti ovalumenhu okwa li tava shingi otuwa yoNissan Tida va ninga einda mondjila yopate yoB1.

Okwa ti nakuninga oshihakanwa okwa ka patulula oshimbofa kopolifi yaKatutura nokonima opolifi oya kala ili molukongo lokukonga otuwa yaye fiyo tai monika eshi ya hangika kolukanda loGoreangab moWindhoek ya pangululwa eshi ya kufwa oitopolwa.

Shikwamba okwa ti kapena omufekelwa a kwatwa po natango.

Edi oda popiwa momushangwa pitifi wa dja mombelewa yaShikwambi eshi a kunghulila oshiwana opo shi kale sha kotokela ovapolifi voipupulu hava kala tava kengelele oshiwana.

“Oshiwana nashi kale tashi dengele oitaashi yopolifi ile omupilifi ou ve shi opo va pule ngeenge omunhu ou eu  ya kuvo  omupolifi tuu woshili. Ovanhu nava kale tava konakona nawa eetuwa ngeenge odina tuu oshihako shili shopolifi, vo nava tale oikutu ei yadjalwa komupolifi ngeenge oya fafana tuu nai yovapolifi vo shili,” Shikwambi ta ti.

Okwa yelifa ta ti eetuwa dopolifi odina omaluvala a longelwa ko iha ma diko omanga eetuwa dovapolifi voipupulu oha di kala danatekwa oumbapila ve na omaluvala a fa aa eli ketuwa dopolifi.

“Ku keshe omunhu ta ka monika eli ninga omupolifi woipupulu ota pewa ehandukilo leedula nanho modoolongo ile ta pewa a fute oshimaliwa she handukilo,” Shikwambi ta ti. Okwa weda po ta ti oshiwana nashi kale tashi tale oukalata vovapolifi ngeenge otava tu kumwe tuu noipala yavo.

“Ovapolifi ove li longekida okukala  va kwatwa po ovanhu tave li ningi ovapolifi voipupulu opo oshikumungu eshi shi kale shaxulifwa po moNamibia,” Shikwambi ta ti.

Okwa kunghulila oshiwana opo shili kale ke kokule nokulonga oilonga ya nyika oulingilingi wo ludi eli shaashi eshi otashi ka keke edina lopolifi. – fhamalwa@nepc.com.na