Ovalumenhu vaheyali ova anyenwa okulifutila mo modolongo konima eshi va holoka momhangu oshivike sha dja ko.

Ovatamanekwa ova kwatwa po konima eshi vati va dipaa oifitukuti kEtosha nokuhangika neembinga domhanda meetuwa davo.

Ovatamanekwa vavali ova kwatwa po momafiku 06 peinda lopolifi moTsumeb omanga vakwao vatano va kwatwa po momafiku 07 kOutjo pefimbo opolifi kwa li tai ningi oshikonga.

Ovatamanekwa ovo Sakaria Johannes, Tomas Domingos omukwashiwana waAngola, David Nakare, Makanga Johannes, Matema Thiyemo, Shampampi Ndjunga  naKamanya Kandjimi.

Omupopiliko omukulunhu mouministeli womidingonoko, omakuti nomatalelopo Romeo Muyunda okwa koleka oshikumungu eshi.

Muyunda okwa ti omakonakono opolifi otaa twikile moibofa aishe yokudipaa oifitukuti kEtosha.

Okwa kumaida oshiwana momidingonoko da dingonoka Etosha National Park opo va longele kumwe novanambelewa tava longele kEtosha mokukondjifa oumbudi wokudipaa oifitukuti.

Onghee okwa ti oshiwana opo shi kale tashi yandje ouyelele nashi dengele kongodi 55555.

Omunhu keshe ta ka yandja ouyelele kombinga yovanhu tava dipaa oifitukuti kEtosha National Park ota ka pewa olupandu N$50 000. -fhamalwa@nepc.com.na