Minista womalelo, eedoolopa nomayambulepo okoushai Erastus Uutoni okwa yadja pambelewa omaumbo eli 22 kovakalimo koilyo yehangano loShack Dwellers Federation.
Omaumbo aa yandjwa okwa tungwa kongushu yoshimaliwa sheemiliyona NS2.7, nokuli ponhele pena omayakulo elixwapo.
Moshipopiwa shaye Uutoni okwa pandula elelo lodoolopa yaKahao eshi lina oshisho novakalimo valo vena oyuuyemo i li pedu, eshi la yambidida opo va kale va mona edu apa va tungilwa omaumbo avo mopaife.
Uutoni okwa ti ouministeli waye otau lalakanene okukala wa kwafela ovanhu avashe ve na omhumbwe yomaumbo opo va kale va mona omaumbo eli pashinanena ngaashi naana edoolopa adishe dina omaumbo.
“Ouministeli wetu otau kwashipaleke kutya ondado yomaumbo otai dulika nokovanhu vena oyuuyemo i li pedu. Onghee onda pandula ehangano eli loShack Dwellers Fedaration eshi tali twikile nokukala tali yambidida ovanhu vena oyuuyemo ili pedu opo va kale va mona omaumbo navo,” Uutoni ta ti.
Minista okwa ti ovanhu nava kale va takamifa omindilo shaashi odili da nyika oshiponga neenghono.
Moshipopiwa shaye omunambelewawiliki melelo lodoolopa yaKahao Simon Shinguto okwa ti elelo lodoolopa yaKahao ota li twikile okukala tali yandje edu opo ku tungilwe ovanhu vena oyuuyemo i il pedu omaumbo.
Shinguto okwa ti ove li va yandja natango eenhele domadu dili 30, meni lodoolopa yaKahao, opo di kale ta longifwa oku tungwa omaumbo ovakalimo.
Okwa denga omufindo ta ti ovakalimo nava twikile okukala tava futu omayakulo omodoolopa ngaashi omeva, nolusheno opo ashike veli kelele okukala vena eendjo da muni dili pombada.