OUTAPI - Ovakalimo vomoshikandjohoololo shaTsandi moshitukulwa shaMusati ova ongala onghela pombelewa yangoloneya waMusati tava lili enota lanyaa kehonga olo le lihanena momikunda davo. Petrus Shiweva oo a li e kwetele komesho omunyanyo ou okwa ti voo ova loloka enota olo va kala nalo oule weedula da fika po33. Ova kufa onghatu opo va ninge ehololo lomadilaadilo fiyo opombelwa yangoloneya woshitukulwa shavo Erginus Endjala opo va yandje omukanda womanyenyeto molomhumbwe yomeva momudingonoko wavo.
Shiweva okwa popya kutya moshikandjohoololo shavo omu na omikunda da fika puheyali dihe na eepomba domeva. Ovakwashiwana ohava nu ashike omeva oshimongwa nokwa kaka, hano inaa nyika nande oundjolowele. Omikunda ngaashi Otalihengendje, Ondjambayahonga oshoyo Etikukutu odo ashike di na omeva mayela. Petrus okwa popya kutya omikunda natango di li moshikandjohoololo shaTsandi ngaashi Amaupa, Iikokola, Oshikandjangala (Olyasiti) onghee tadi twikile okunwa meendungu, oshoyo momadiva oule weedula 33. Konima yeedula dakapita ovakalimo vomoAmaupa ova kala hava etelwa omeva kokaloli lumwe ile luvali momwedi ndele paife ihaka eta vali. Ovakwashiwana vomomikunda edi ova ninga yoo onghendabala opo va kale hava lande omeva peedolopa dopopepi tashi dilile kombelewa ya kansela ndele ohashi pula nande oule weemwedi nhatu omeva aa inaa fika.
“Ngeenge omeva aa twa landa a fiki kape na ou a pitikwa a teke omandini eelitela 20 a fika pomulongo,” Shiweva ta ti. Omandini aa hatu pitikwa tu teke omashona neenghono okuwanena ovanhu shaashi omaumbo amwe oku na ovanhu vahapu oo ihaa kala po. Onghalo ya tya ngaha ohai fininike ovanhu opo va ka nwe omeva a kaka shaashi kave na nghee.
Vamwe nokuli ngaashi ovakulupe ohava pange tava mono oixuna kokudjala oikutu ya kaka shaashi keve na apa tava kosho. Natango onghalo ya tya ngaha oya kwata yoo ounona vofikola moshipala shaashi ohava ende oinano ile opo va dule okuka konga omeva opo va dule okulikosha oshoyo okunwa.
Ovadali ovo navo vahapu vomuvo ohava mono oixuna ngee tashi ya pokulanda oidjalomwa younona yofikola, oyo ihapu yomuyo hai kala ya mona oixuna nokukulupa diva shaashi ohaikoshwa nomeva e na oshimongwa.
Shiweva okwa popya kutya omikunda odi na ovanhu vahapu ve li kepango, nohava nwifa omiti davo omeva a kaka. Vamwe oukolele wavo otaweende taushongola lela molwomeva aa shaashi okuyadi ondova.
Ovakalimo vomoshitukulwa omu, otava nyenyeta kutya ova loloka enota oshoyo oudu ou hava etelwa komeva aa unene tuu oshimela.
Tava ti ngeenge pomudingonoko pe ya ololi yomeva ovanhu ohava kala tava kondjele omeva osho sha etifa nokuli nomaushiinda a topoke.
“Otwa ninga yoo onghendabala yokudengela eembelwa dookansela hatu pula omakwafo ndele fiyo opapa inatu nyamukulwa. Fyee otwa loloka,” Shiweva ta ti.
Silas Andreas (35), umwe womwaavo kwa li tava nyanya okwa popya kutya yee oha kala ashike e lineekela momeva odula. “Odula ngee ya ya ohatu twikile nokumona oixuna komeva aa malula shee hatu vele momadimo.
Ohatu kendabala yoo okutula omeva oumuti venya hava di koshipangelo ashike nande ongaho kashi idule shaashi natango onghee taa twikile nokukala e na oshimongwa.” Andreas ta ti.