Omukainhu weedula 47 oku li moshipangelo ta ningilwa omakonakono opaunamiti konima eshi vati a kwatwa onghonga kovalumenhu vatatu.

Oshiningwanima osha ningwa momukunda Ondiimwenena moshitukulwa shaShana mexuliloshivike. 

Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa longelwa omunyonena wopaixulo pefimbo kwa li tadi keendingosho oufiku. 

Opolifi oya ti omukainhu okwa shakeneka ovalumenhu mondjila moixwa ndele teve mu nhukile noku mu ningila omatilifo fiyo tava i naye moixulo.

Ovafekelwa aveshe ova kwatwa po notava pangulilwa oshibofa shekwatonghonga.

Oshiningwanima shikwao, opolifi moshitukulwa shaKhomas otai konakona oshibofa shomukainhu weedula 28 ou vati a kala noku kwatwa onghonga lwoikando ya yooloka molukandu Havana.

Ota ku hokololwa kutya omukainhu okwa kala noku ningilwa omatilifo edipawo ngeenge okwe shi popi kutya oha ningilwa omunyonena wopaixulo. Omufekelwa ina kwatwa po natango ashike opolifi oye li pyakidila nokuningila omufekelwa omakonakono. 

Opolifi otai kumaida ovakainhu opo vaha kale vali va mwena ngeenge tava ningilwa ominyonena dopaixulo ndele nava lopote diva opo va dule okukwafelwa. fhamalwa@nepc.com.na