Ovakalimo vokoWalvis Bay, ava hava mono oyuuyemo i li pedu moshitukulwa shErongo osho va mono omaumbo moWalvis Bay oshivike sha dja ko, a tungwa komunghulo wombuwa.
Ominista yomayambulepo eedoolopa nomikunda Erastus Uutoni okwa tumbula kutya ediladilo lokutunga omaumbo moWalvis Bay ola undulwa koShack Dwellers Federations.
Shacks Dwellers Federation ehangano laNamibia li lile po okudidilika ovakwanaluhepo, oshoyo okudidilika nokutofa mo ava ve na omhumbwe yomaumbo va dule okupewa ekwafo.
Uutoni okwa ti omaumbo okwa nuninwa ovanhu ve na oyuuyemo yopedu opo navo va dimbulukiwe.
Okwa ti yoo okwa uda kutya etungo lomaumbo oli li po okutula ovanhu kumwe nepangelo lavo, oshoyo okukala ve na elongelokumwe neudafano li na eenghono.
Okwa tumbula yoo kutya epangelo laNamibia ohali kwafele omahango ngaashi Shacks Dweller Federation ngeenge taa longo oilonga yoludi eli, moku va pa oshimaliwa opo va dule okulonga shomupondo mokuyambidida ovanhu.
Uutoni natango okwa tumbula yoo kutya epangelo ola kala li na omukalo wokuongela oshimaliwa, sha nuninwa ovamoni voyuuyemo yopedu.
Okwa twikila kutya okudja mo2000 fiyo opapa epangelo ola longifa eemiliona N$111,8 odo da longifwa okutunga omaumbo e fike po3 555 moNamibia.
Minista natango okwa tumbula kutya ouministeli wavo owa yandja omwaalu woshimaliwa sheemiliona N$10, di kwafele okutunga koGobabis mokuyambula po omaumbo aava ve li momalukanda va pumbwa eputuko.
Helao Nafidi vati okwa pewa omiliona imwe i kwafele komeva, oshoyo okulanda eepaipi dokweenda omeva onyata. Karibib okwa pewa eemiliona N$5 dokuyambula po odoolopa, omanga oWalvis Bay ya pewa omiliona imwe i vatele moikwa noipangifo yokuamena oushelu modoolopa.
“Mokuvatela momukalo wa tya ngaha, ovanhu vahapu otava kala ve na eemhumbwe di li popepi navo, noitava ka longa noudjuu,” Uutoni ta ti.
Okwa tumbula yoo kutya epangelo opamwe nouministeli, ole lilongekidila okuyambidida omahango ngaashi Shacks Dwellers Federation of Namibia, ovo hava holola elitulemo lavo mokuyambidida ovakwashiwana, mokupewa omaumbo e na ombilixa, oshoyo okuyandja omauwa kwaava ve na eemhumbwe.