OTAMANZI - Ngoloneya waShana naMusati ova li va unganeka osheendo shokutalela po okanaala komeva va tale nghee taa tondoka.
Eshi vati ove shi ninga molwomanyenyeto a dja kovakwashiwana tava nyenyeta omeva a pombwa kEtaka eemwedi da kapita taa ende kashona.
Oongoloneya ova pangela omangela opo ve lidenge ondjila va shikule okanaala komeva va tale apa pe na epuko. Eshi va fika pOtamanzi, ove lidenga mokanaala ka pombolwa, ka ningwa omukangha wakula tau twala omeva momunghulo, ponhele omeva a tondoke a lamba omukangha wokanaala koovene a finda komesho.
Ponhele apa pa ningwa omukangha opwa hangika yoo pa ninga etale lakula, shaashi omeva itaa tondoka vali a ka fike oku a li a nuninwa.
Ngoloneya waMusati Erginus Endjala okwa tumbula kutya omeva vati okwa li e na okutondoka mokanaala a ka fike komulonga waPonona. Okwa twikila kutya ponhele apa okanaala ka papulwa kovakwashiwana, vati ope na 55.8km, opo a ka fike ngeno komulonga waPonona.
Endjala okwa ti eteko lokakanala ola etifa etondoko lomeva li ninhipale, shaashi vati omeva okwa finda ashike ombinga imwe.
“Omukalo ou wa longifwa kovakwashiwana omukalo umwe ui nai, wokulihola mwene. Paife omeva apa okwa ninga po etale, omanga vakwao tava lili enota lamatutu,” Endjala ta ti. Olopota imwe ya dja kovakwashiwana vati natango oya tumbula kutya vamwe vomovakwashiwana vati ova tunga yoo omakuma meendjila dokanaala opo omeva aha tondoke a finda kokule ndele a xulile ashike pomalukalwa avo.
“Keshe fimbo ohatu mono eelopota movakwashiwana tava nyeyeta enota, ashike mboli ovanhu ove lipa eenghono okukwata ko omaliko epangelo ve a ningile eshi va hala, omanga a pumbwa okukwafa ovanhu aveshe,”Endjala ta ti.
Okwa twikila kutya omeva paife okwa tondoka ashike fiyo opUuvudhiya, nope na natango vati 30km okufika kOponona.
Ovanafaalama ava vati hava di kOponona ohava shingi oimuna yavo keshe efiku 30km opo ve uye va nwefe kUuvudhiya.
Vahapu otava nyeyeta kutya oinano oile unene, yoo oimuna oya kumbala nale. Momukalo wa tya ngaho vati otava teya po ashike oimuna yavo.
Ngoloneya waShana Elia Irimari okwa tumbula kutya omeva okwa li a nuninwa okuvatela oimuna, novanhu ava tava dengwa kenota.
“Elalakano okwa li okufika kOponona, shaashi oko ku na ovanhu noimuna ihapu, ashike paife ngaha natango ove na okunana noudjuu molwovanhu tava ningi oinima ya tya ngaha,” Irimari ta ti.
Okwa ti omilandu otadi ka tulwa peenhele, opo pa hoololwe ovatonateli vokanaala. Okwa tumbula yoo kutya ovatauluki voveta otava ka pewa yoo ehandukilo lakula. Omukonaakoni womeva kombelewa yaNamwater Leornard Hango okwa ti okanaala komeva oka tewa oikando ya fika puine, noshikando eshi paife oshititano, ponhele apa pa panunwa natango.
Okwa twikila kutya eshi vati osho tashi endifa omeva kashona, notashi shunifa oilonga yovanhu vahapu monima.
taimihaihambo2000@gmail.com