ONGWEDIVA - Omunashipundi welelo lepangelo li lile po edu, Paulina Uugwanga, opamwe novakwatelikomesho moshikondo shoinima ya nyika edu, ova kala omutumba nomalelo a yooloka shi na sha novanhu ovo va tunga peenhele inadi shangifwa paveta mOshikoto.

Uugwanga okwa ti, ovanhu vahapu ove likufila edu inava landula omilandu da tulwa po kekotamhango loshilongo. Okwa tumbula kutya ovanhu vahapu ova tunga pedu inali shangifwa paveta, nepangelo lopashitukulwa otali longo noudjuu omolwoshinima eshi.

Okwa twikila ko kutya eenhele dihapu mokaalita kedu otadi ulike da li di na oovene ashike ova fya, dimwe kadi li melandulafano doo dikwao kadi na oovene. Eshi osha etifa elelo lopashitukulwa li fyaalepo nonhele ishona yedu.

Omishangwa da yandjwa kuUugwanga oda popya kutya, moshitukulwa ashishe shaShikoto edu eli la shangifwa lokuhiila oli li po 133, efyuululwadu 20 754, omanga edu lomaulifilo nomaumbo li li punola. 

“Omashango efyuululwadu mOshikoto otali ende xwepo shaashi ovanhu vahapu otave lishangifa, ashike edu lokuhiila oshoyo edu lomaulifilo nomaumbo otaa shongola. Eshi tashi nyemateke osheshi kutya, oshitukulwa osha pwa ko ashike keenhele domangeshefelo, eefikola, eengeleka, omahangano a yooloka, omaumbo oshoyo omaulifilo ndele oinima aishe ei oi li pedu inali shangifwa paveta,” Uugwanga ta ti.

Uugwanga okwa popya yoo kutya omilandu dedu oda yela ndele ovanhu mbela kave udite eshi tadi ti. “Omutumba wonena otwa hala okuyeleka nokulombwela ovanhu efimano lokukala u li pedu la shangifwa paveta nokukala u na odjapo yalo,” Uugwanga ta weda po.  Okwa popya yoo efimano lokukala u na edu la shangifwa kutya ohashi kala shipu okukandula po omaudjuu e na sha nomikundu dedu. “Ohandi kunghilile ovanhu aveshe va kale ve na omadu a shangifwa paveta,” Uugwanga ta ti.