OSHAKATI-Ekaleko, ekano nongushu lyiinima hayi zi kondje yoshilongo, oya shololitha Aanamibia oyendji, mboka yali haya mbesitele unene iizalomwa oku pitila momukalo tagu ithanwa ‘order with me’.

Oyendji taya longekidha iituthi unene yoohango nuummvo oya tokola okuhondjitha iikutu yawo kaahondji meni lyoshilongo nomatompelo ngoka kutya oya tila iituthi yawo yithike, yo tayi adha iizaloma mbyoka ya mbesitela kiilongo yo kondje inaayi thika.

Onkundana ndjika okati komokutsi kaahondji yomoshilonga mboka yali ya kanitha ongeshefa medhina lyaorder with me. 

Soini Shileka gwomOshakati ngoka a li ayi moonkundathana nomutoolinkundana nguka okwa ti, ongeshefa otayi ende nawa lela.

“Omumvo aguhe nguka otwa kala tu na ookasitoma, yamwe otse ta tu ya shunitha ko kutya out undha oshoka ota tu hondjo iikutu yoohango,” ta popi ngaaka. 

Ta ti, oyendji otaya hokolola kutya itaya longitha we “order with me” oshoka iha thiki pethimbo, natango shoka wa pula hasho lela ho mono, ohashi pula ishewe oshimaliwa wu keshi ningululithe.

Ta gwedha po ta ti, ngaashingeyi okuna ohango yi li ko muOkotomba nuumvo, ihe okwa hondjo okuza koofeyi, ooshuta adhiihe nikutu yiinkumbi.

“Onduuvite nawa lela oshoka oongeshefa dhetu otandhi yambuka po, oshoka okwali dha dhipagwa ku “order with me”.  Ihe otandi iindile ya kaleke po ombepo ndyoka yena paife, opo tu tsikile okulonga,” ta popi ngaaka.

Omuhondji omukwawo, Martha Shinedima okwa ti, iha mono pena eyooloko pokati kwaashoka sha za kondje yoshilongo, nashooka haya hondjo.

Ta ti, sha ashike ya pewa oshinakugwanithwa shoku hondja pethimbo, iikutu mbyoka ohayi kala ya hondjwa nawa, oshoka oya hondjwa nethimbo.

“Oshigwana osha kala noku nyenyeta kutya, aahondji aanamibia ihaya mana mbala okuhondja, shoka hasho, ihe aahondjwelwa oyo ihaaya gandja iinima yawo ku yele,’’ ta ti ngaaka.

Okwa gwedhapo ta ti, ookasitoma odha ndhimbulula kutya aahondji aanamibia kayena nando uupyakandhi wa sha.

Omuhohindji gwomulumentu, Silas Shekuza gwomOshakati okwa ti, pethimbo ndika ita vulu we okutaamba ookasitoma oshoka okuundha.

“Ondina iikutu tayi hondjwa oyindji noonkondo, oshowo yoohango ndhili ko omumvo ta guya. Onda hala okumana ashike yomumvo nguka opo ndi tsikile naamboka yomumvo ta guya,’’ ta ti ngaaka.

Omunangeshefa omunene goku hondja iikutu Taukondjo Shivute, ngoka e na oshinayeta shili moMatala gaShakati tashi ithanwa TK fashion design naye ota yolele kehego. 

Ta ti, nando ya kala noku kema molwa oongeshefa tadhi shongola medhina lyaanamibia aakwawo taya ka konga iikutu yiituthi kondje yiilongo Nampongo a yamukula omagalikano gawo. 

“Oohango odhetu shuna kopate hoka kwali twa gwa ko uule wethimbo, ookasitoma ngaashingeyi otadhi ende lela nawa, ngaashi te popi ngeyi oshinayeta shandje osha udha iikutu, yuunkumbi oshowo yaakuluntu yoohango,” ta popi ye ta imemeha. 

Ta ti omanyenyeto gawo oguuvika koshigwana, nayo ngiika oya ndhimbulula kutya oshimaliwa otaye shi tutile kondje yoshilongo, omanga oonkulungu taye dhi thigi moshilongo. 

Shivute ta ti oku wete kutya epuko opo lya li mpoka ashike nayo oya ka longa ya itula mo opo ya galule ookasitoma dhawo.

“Ngeno okwali ngaa osho tashi kala ngeyi ngeno noshimaliwa moshilongo shetu omo tashi kala, no itatu kala po oku galula eliko lyooshilongo”, Shivute ta ti ngaaka. 

Ta gwedhapo ta ti, aaNamibia naya kale yiihole yo naya isimaneke, ngele gumwe ina panda shoka a ningilwa na gandje omanyenyeto ge e ta ga pukululwa, naashoka otashi eta omalunduluko omawanawa, nehumokomeho. 

“Otandi kumagidho wo natango aahondji aakwetu, opo tu kale ke oondando pevi, tu vule okukwatela po ookasitoma dhetu, nena ngele otatu nanene natango otaya shuna,” ta ti ngaaka. 

Maria Negonga ngoka ha longo onge omuhondji moshinayeta shaTk fashion design okwali a lombwele Kundana ta ti  onkalo oya lunduluka okuza omvo gwayi.

Natango omvo gwayi, nga ethimbo ndika , okwali ya kalelwa kookasitoma.

Ta ti, ngaashi mboka ye na oohango dhi li muDecember, oya pula nale ya tamekelwe oku hondjelwa opo kaa ya ka tokithwe. 

“Otuna oohango dhili odhindji dhiliko omasiku ngaka twa uka, oshowo ndhimwe dhili ko momwendhi ta guya. Ngashingeyi otwa mana po ashike etata dhomwaa ndhoka. 

Otuna natango iikutu yoohango tu na okuyi mana omanga omwendhi inaa gusa” Negonga ta ti.

Tati ota pandula lela oshoka ayehe yeli moshinayeta oonkulungu mokuhondja lela no ke wete tashi kala oshi dhigu oku mana iikutu mbyoka mule womasiku ngoka ga hupa ko. 

-vkaapanda@nepc.com.na