Opolisi moshitopolwa shaShikoto oya manga po aalumentu yaali sho anuwa ya adhika noondhalate dholusheno mehuliloshiwike.
Omukuluntu gopolisi moshitopolwa shaShikoto Teopolina Kalompo-Nashikaku okwa tumbula kutya uufuthi owa ningwa mOlyomakaya, naalumentu mboka yaali oya li ya mangwa uusiku owo tuu mboka.
Otaku hokololwa kutya aalumentu mboka okwa li ya tete ondhalate yehangano Dundee Precious Metals, nokuyaka mo omahwata goongodhi ndhoka.
Opolisi kakwa li ya popi ongushu yoondhalate ndhoka.
Aalumentu mboka anuwa ethimbo ya li ya ponokele ehala ndyoka, kakwa li ya monika komukeeleli gomaliko, ihe oshiningwanima shoka osha ka ndhindhilikwa konima ya za mo nale mehala.
Omwedhi gwa yi omulumentu gwomimvo dhopokati okwa li a si, sho a shokwa kolusheno pethimbo kwa li ta kambadhala okuyaka oongodhi dholusheno.
Oshiningwanima shoka okwa li sha holoka momukunda Ekamba.
Omumvo gwa yi aafuthi oya li natango ya yaka oongodhi dholusheno dhongushu yi vule poomiliona N$15 dhehangano lyomalusheno Nored, nokwa li kwa londodhwa kutya otashi vulu okweeta oshiponga oshinene miitopolwa.
Omukuluntu gwomawutekenika mehangano lyoNored Petnen Frans okwa ti oshinima shoka osha nika oshiponga noonkondo, otashi vulu okufika omagumbo ogendji.
“Oshiningwanima shoka okwa li twe shi tseyithilwa koshigwana, sho oombudhi dha ponokele ehala lya gamenwa lyo lyi ikalekelwa, sho ya tete ondhalate okuya mo e taya yaka mo iitenda yoaluminiuma,” Frans ta ti ngaaka.
Ta hokolola ta ti iitenda mbyoka oya li yi na ongushu yi vule poomilliona N$15 kehe poshitaasi shomalusheno.
Ta ti oya li ya lopotelwa kutya aafuthi mboka oya tameke kooshitaasi shomalusheno kOpuwo, Oshikuku noya li ya thika mOngwediva.
Frans okwa popi ta ti mboka taya longo iilonga yi li ngaaka, oye na okukala ye na ontseyo onene yomalusheno oshoka oya teta ye shi kutya otaya tete peni opo oongodhi ndhoka dhi na oku eta omulilo kaaye dhi nyenge.
Okwa li a gwedha po ta ti omahala ngoka oga nika oshiponga onkene inaga uthwa okupitwa kukehe gumwe, omulilo tagu ende moongodhi moka ogundji nayi nogwa nika oshiponga.
Frans okwa indile oshigwana shi longele kumwe nopolisi uuna ya mono omuntu ta landitha nenge ta piti omahala ngoka, e shi lopote kopolisi yi li popepi naye.
vkaapanda@nepc.com.na