Ookahewa yaali, gumwe omugandjimayele gwopashimaliwa kehangano lyoSanlam namukwao omuniilonga koHollard Insurance moRundu, oya hooloka komeho gompangu kuyele oshiwike shika sho anuwa ya yaka po oN$200 000 yomupunguli gwoshimaliwa koSanlam.

Aatamanekwa oyo Victoria Kavu, 32, nomunamimvo 39 Christophine Shininge. Shi ikolelela kuuyelele wompangu, aakiintu mbaka oya yaka po oshimaliwa shomukiintu ngoka a li a pungula oshimaliwa shoN$200 000 komapungulilo ge mehangano lyoSanlam. 

Mbaka oya li ya kwatwa po momasiku 6 Juni 2023. Ompangu otayi ti Kavu ngoka ha longele oSanlam noha kuutumba mombaanga yoBank Windhoek okwa lundululile oshimaliwa shoka komapungulilo gokoHollard, ngoka ge li medhina lyakahewa ke Shininge.

Ayehe oya holoka mompangu, komeho gomupanguli Sonia Sampofu.

Kavu ota pangulilwa iipotha iyali, shuulunga pamukalo gwekengelelo, noshowo oku ya kondje yookatendo keli ompinge nuumbudhi wa longekidhwa. Shininge ye ota tamanekelwa oshipotha shuulunga pamukalo gwekengelelo noshowo iipotha iyali yoku ya kondje yookatendo hoka keli ompinge nuulunga wa longekidhwa.

Tango, aakiintu mbaka oya li ya pewa yi ifutile mo mondholongo noN$40 000 kukehe gumwe ashike oya ka silwa ohenda e ta ya pulwa ya ifutile mo noN$10 000 mukehe gumwe. Oyali ya silwa ohenda mEtiyali molwashoka ayehe oyeli aanyangeli yomagumbo gawo. 

Kavu okwali a kalelwa po kaakalelipo yopaveta ya za kehangano lyoBernhard Tjatjara Law Firm omanga Shininge a kalelwa po komukalelipo wopaveta a za kehangano lyoThomas Appolus Law Firm. Variety Matamata oye a kalele po epangelo. –Nampa