OSHAKATI - Omulumentu gwomimvo 21 okwa si eso lyi nyanyaleka sho a hahalwa nekuya komulumentu ngoka a li ha zi naye mondunda yimwe. Nakudhipaga naye anuwa okwe ki imangeleka konima a longo iilonga mbyoka.
Sha ikolelela kepeko lyopolisi, oshiningwanima shoka osha holoka lwopotundi 04h00 mOsoondaha.
Otaku hokololwa kutya Petrus Junias gwomimvo 28 a li a ponokele omulumentu gwedhina Ananias Angala nekuya koongulasha ngoka kwa li a tameke okukuga ta pula ekwatho.
Omuniilonga pamwe nayo ngoka a li u uvu oonkugo okwa li a kambadhala okuteya po omweelo nelalakano lyokuyambidhidha Angala.
Opolisi oya ti sho omweelo gwa eguluka Angala okwa li a zi mo ta matuka ye ta tika ombinzi noonkondo.
Tayi ti, Junias okwa li a tanaukile po omuniilonga ngoka a li apatulula pondunda, e mu tidhaatidha nekuya, ihe kakwa li a adha omulumentu ngoka.
Junias anuwa okwa li a shuna mondunda e ta imangelekele moombuli dhondunda moka mwa tamekele iikolokosha.
Opolisi nomulumentu ngoka anuwa okwa li ya andha Angala metale lyombinzi, oomieta oshona okuza pondunda mpoka.
Otaku hokolololwa kutya oonakusa okwa li ya monika uusiku wOlyomakaya taya lile pamwe uulalelo, ihe kakwa li taya ulike ye na uupyakadhi pokati kawo.
Aakwanezimo ayehe yoonakusa oya tseyithilwa.
Omakonakono gopolosi otaga tsikile.
Moshiningwanima shimwe shi nyanyaleka omulumentu gwomimvo 29 okwa mangwa po kopolisi mehuliloshiwike sho a dhengagula omupambele gwe sigo ta si e ta thigi e mu egeka koshitayi shomuti a endjelela.
Sha ikolela komupehakuluntu gwopolosi moshitopolwa shaMusati Moses Simaho, oshingwanima osha holoka momukunda Iipanda yaMbalantu, pokati kEtine nEtitano.
Otaku hokololwa kutya nakufekelelwa oshiningwanima shoka okwa li a dhengagula nakusa noshiti oshitalala shomusaati iikando oyindji moshipala, sigo a si kuululume.
Simaho ta ti, omulumentu ngoka anuwa okwa li a tsikile nokweegeka olutu lwanakusa pomuti e te mu tula ongodhi mothingo.
Shoka sha etitha edhipago inashi tseyika, nomakonakono gopolisi oge li metifa.
Nakusa okwa tseyika nedhina Ndeilenga Martinus a yambukile komukunda Ombafi.
vkaapanda@nepc.com.na