UUVUDHIYA - Aakalimo yomoshikandjohogololo shUuvundhiya yamwe mboka ya kala yaana olusheno nomeya otaya ka ninga aanelago sho taya ka mona omayakulo ngoka oshali, pomindhingoloko dhawo.

Omeya nolusheno ngoka otaga ka andjanekwa okupitila moproyeka yokuyambindhindha oshigwana, notashi ka ningwa okupitila moombelewa ndhoshikandjohogololo.

Kansela gwoshikandjohogololo shUuvudhiya Timoteus Shivute okwa ti, omayakulo ngoka otaga ka yambindhindha aanangeshefa momikunda dhayooloka okuhuma komeho.

“Omangeshefelo ohaga humu komeho ashike uuna omeya nolusheno geli po, sho shoka ta tu longo nuundhiginini oku andjanekela komahala hoka inaaku thika nale omayakulo ngoka,” ta popi ngaaka.

Ta fatulula kutya omayakulo ngoka otaga tulwa ashike pehala limwe, lwomangeshefelo, na kehe ngoka taka kala a hala gathike megumbo lye, okwa manguluka okuhila.

Ta ti, aakalimo yokomikunda ndhoka tandhi ka andjanekelwa omalusheno nomiya odha kala dhaana omayakulo ngoka nando, naakalimo oya kala noku ga pula.

“Omanyenyeto gawo osho ga yamukulwa,” ta popi ngaaka.

Shivute esiku ndyoka okwa li agumu kondjila ndyoka yuuka kOnkani, okuuza kOnaando, ndyoka ya kala noku nyenyetwa kaakalimo.

“Ondjila ndyoka oyi li momusholondondo dhoondjila tandhi kalongwa kehangano lyoondjila Road Authority(RA),” ta popi ngaaka.

Ta ti, aalongithi yo pate ndyoka inaya pumbwa okutila, oshoka omauwanawa oge li po kuya, ondjila ndyoka oya pitikwa nale okulongwa.

Micheal Sheehama ngoka a za komukunda Ondjungulume okwa ti, epangelo ota li ningi nawa sho ta li fala omayakulo ko kuti.

“Otwa kala twa taalela omaupyakandhi ga yooloka oshoka ka tuna omalusheno nomeya geli popi. Shika otashi ke tu yambindhindha noonkondo,’’ ta ti ngaaka.