Opolisi moshitopolwa shaShana oya ti, omwaalu gwaantu ya si komeya gefundja ogwa thiki puyatatu moshitopolwa shaShana, ashike. Ndhoka odha popiwa komugandji gomauyelele gopolisi moshitopolwa shaShana Thomas Aiyambo sho kwa li ta gandja ehokololo lyomulumentu gwomimvo 56, ngoka olutu lwe lwaali lwaadhika pooha dhomeya oshiwike sha ziko momukunda Oshakati shaPinihas.
Omaso omakwawo geli gaali oga li ga holoka mesiku limwe iiwike iyali ya piti, moka mwa kwatelwa omukulupe gomimvo 80 oshowo okamati komimvo 15.
Ota ku hokololwa kutya oshingwanima shoka sha holoka ethimbo omulumentu ngoka taku hokololwa kutya okwali ena uunkundi wopamandhilandhilo kwali tayi a katalelepo aakwanezimo ye.
Opolisi oya ti, omulumentu ngoka hugunina okwali a monika puundunda womanwino tau ithanwa Oohama, momudhingoloko Omusimboti. Ta yi hokolola kutya, olutu lwomulumentu ngoka okwali lwaadhika lwambuta kombinga yimwe, no kwali lwa monika ashike ongula yEtine.
Aakwanezimo ye okwali ya kambandhala okumukonga okupitila komalungula sho kwali ya mono pwa piti esiku alihe ina galukila kegumbo. Nakusa okwa tseyika nedhina Rafael Isak Iipumbu.
Aiyambo okwali a kumagidha oshigwana shi kale aluhe tashi sile aapambele yawo oshimpwiyu unene mboka yena uunkundi wa yooloka pethimbo ndika lyomeya taga tondoka.
‘’Otandi kumagidha wo natango oyene yuundingosha ya kale taya landula oowili dhawo dhoku pata, ihe haku pitilila ethimbo lyomikanda dhawo,’’ ta popi ngaaka. Ta ti, shoka okwe shi popi oshoka oya lopotelwa kutya oshiningwanima shoka osha holoka pethimbo omulumentu ngoka a li azi pehala lyomaninwo pethimbo yoowili dhokoongula sha.
Shoka osha holoka ashike omasiku omashona sho omulumentu gomimvo 35 kwali alyatwa keshina lyokolutenda.
Omugandji gomauyelele moshitopolwa shaShikoto Ellen Nehale okwa ti, oshiningwanima shoka osha holoka uusiku wEtine momukunda Oshifukwa momudhingoloko Omuthiya.
Otaku hokololwa kutya omulumentu ngoka okwa li alala mondjila yeshina lyokolutenda.
Opolisi oya ti, olutu lwe olwa nyanyukapo thiluthilu. Aakwanezimo ye oya tseyithilwa.