Mashazi Mahoto

KATIMA MULILO – Babañwi bane bafumani lico zalinanga zasilimo se, babilaezi kuli lico zene bafumani neli zebusula zesaswaneli kuciwa.Mulyaminzi wa munzi wa Malengalenga mwasilalanda sa Linyanti, Poniso Malimba naize “bupi kibobusula kuli mane nihaike linja lihana kubuca.” Mulyaminzi yomuñwi Kabuba Sizimbo ili muinasipula wa katengo kakabona zazwelopili yamwaminzi, naize anze aamuhela lipilaelo kuzwelela kwasicaba kuli bupi kibobusula. Nabulezi hape kuli “bupi habusika sumpwa kono bubusula habubapanywa nibupi bobuñwi bobufumaneha mwasikiliti.” Hana buzizwe kuamana nibupi Sizimbo naize buñozwi kuli bupi bwa linanga, bobusalekiswi.” Muyemeli wasilalanda sa Linyanti Cletius Sipapela nasikafumaneha kuli aalabele fataba yeo. Membala wakatengo kakabona zazwelopili yamwaminzi kwa Masikili mwasilalanda sa Kabbe ya Mbowela, Gertrude Sililo natolokile kuli bupi bobufiwa kwa sicaba habu utwahali hande. 

“Bupi bwani bubusula”, nabulezi. Muyemeli wa silalanda sa Kabbe ya Mbowela nanitifalize taba yeo mi naize “lipiho zakuli bupi bubusula halifumanehi feela mwasilalanda saka kono kimwasikiliti kaufela, nekucincizwe mutisi.Kwamulaho nelusebelisanga Kamunu ili yefumaneha mwa Katima Mulilo, mi tumelelano nefelisizwe. Kanako ye selusebelisa kampani isili yezibahala ka Agri yefumaneha kwa Machita mwasilalanda sa Katima ya Matakanyani,” Likando nabulezi kaku alabela kwalipuzo zamutende wo. Hana kupilwe kualabela falitaba zeo muetapili wa kampani ya Agri, Bernard Mutani Mbeha naize naziba taba yeo mi natolokile kuli “bupi habuzwi mwalituli zaluna kono buzwa mwalibulukelo za AMTA kaofesi ya Ngambela wa naha, yene ibulekile kuli busebeliswe kwalinanga”.  Nabulezi hape kuli bupi bo buyozwelela kwasilimo sa 2016/2017 mi sebuinzi nako yetelele. “Bupi bolukaya bobuli mwalituli zaluna, ili bolufa kwalikolo bumwamayemo sakata,” nabulezi.