Outapis di !Ā!khōmais ǀAwemā!nans, Daogu ǂGaes !Khōdanas (RFA) tsî Daogu ǂGaeǂguis (RA) hâdi ge !hūǁare hâse ǀgam kurikha nî !khōǂgā sîsenǁareb ǁnâuguxoaǁguiba ge xoa!gao, ǁnā !ās di daoga !gâi!gâi!nâs ai ǂâisa ra ǂnûise. 

ǁNâuguxoaguib noxopa !khōǂgā hân ge daoga !anu!anus, ǁgamgu nî !kharu!nâ āgu hîa a ǂkhôadīsaga !gâi!gâis tsî mâsib !nâ ūhâǀgarasa !ûi!gâs tsîna. 

Hāǀaro rase, nē ǁnâuguxoaǁguib !nâ a !khōǂgāsan ge dana daob MR92, di ǀnî !âba ūkhâi!nâs ǂgaoǀkhāsa daob ǁguiǂamdi ai ǀoasase nî dīǀoase, kai ǁgamgu nî !kharu!nâ domga kurus, ǀnū!gû-aon ǂgarogu tsî taniǁkhāsiba sī!nâs !gâi!gâide MR123 daob (Outapis tsî Tsandis) ai dīs, dâu!khūde ǁkhaubas ase. 

Nē sîsengu ge ǀaweǁguiba !oa !goaxa ǁkhâb ai nî tsoatsoa-ūhe. 

Dana Sîsenǂuira mâisagu, Conrad Lutombib (RA), Ali Ipingeb (RFA), Ananias Nashilongob (Outapis) tsî !ā!khōmâi-aos, Selma Asinos hân ge ǁnâuguxoaǁguib xoa!gaos ǁaxasiba ǀAeǁgams !nâ ge ǁhao!nâ hâ i. 

“RFAs ge ǁnā ǁaxasib tawa, ǁîs di ǀoasa mâ!gâs di ǁawosasiba ge mā, Namibiab di daogu di !gaeǁares omkhâis tsî khoraǂuis ǂnamipe, nēs ge !hū!nāsise tsî !āǁîse hâ sîsenga nî !khōǂgā. 

ǁKhātis ge RFAsa !ā!nāsi ǂgaeǂguide nî hui!nâ, ǁîdi kai!ā kai !gangu tsî daoga !gâi mâsib !nâ ūhâs ǀkha,” tib ge Ipingeba ge mî. 

Asinos ge a mîs ge, ǁîn di ǀawemā!nans kaise ǂauna ǁgoaǂuidi xa !khō!namihe hâsa, gōsase, kai daob (M123 Outapis tsî Tsandis) nēsi hâ!nâ mâsib ǂnamipe. 

“Nē daob ge hoaǁae !nao!nāsase ra hâ, taniǁkhāsibab nē daoba ra sîsenū autona !nā hâse. 

ǂGui !gôab auton nēn ge āde daob ai ra !aroma tsîs ge nēsa daoba hoaǁae nî !gâi!gâi!nâse īsa ra ǂgaoǀkhā,” tis ge ge mî. Nausan kurikorobe marisa ra !khō!oa daoga kō!gâs !aroma, xawes ge nē marisa hoa ǁgariǁgarisa ǂhâsigu ai dīǀoaǀoa tama ra ī. 

“Omusati ǀkharib !nās !aromas ǁîsa administrasis danas ge ra !aroma Outapis ǀkharib di !khōdanas tsî omkhâisens !aroma ǂhâǂhâsa !âsa ra ǀhurusa,” tis ge ge mî. 

Asinos ge ai!â ge mî, nē ǁnâuxoaǁguib nēsi hâ ǁgoaǂuidi guide gowaǀî dide, xawe !goaxa ǁaeb ǀomkhâis tsî omkhâisenms !aroma īǁkhāsiga ra aiǂhomisa.