ǂHarugu-ao tsî ǂgari-aob, Tsumeb tsî Oshivelos hâra ǀgûse ǁanhâb, Saimmon Mase Mupetamib ge ǁîb !gûǂgarob !nâ !gâin tsî tsūna ǂgariba xu hō!â hâ, ǀguitimî tsîb ge 2017ǁî kurib !nâ ǂgariba a ǁhûisa xu. ǁNān ǁîba kaise !gâise a ǂann ge a ǀhûiǀgui ǁkhā, mâtikōseb ǁîb ǀaob !nâ !hanaǂgās ǀnamma ra dâu !khaisa.

 ǁÎb ge !kharaga !hanaǂûn ǂgaiǀons ai kol-I, tamaden, tsuibeln tsî pepergu tsîna ra ǂgā. 

!Gâi!gâxaseb ge ǀgūǁae ge ǁnā ǀnanuba buruxase ge ǀkhae bi, ǁîb !garo!ās tsîn !gâise ge ǀapihe amaga. “Tita ge ǂnomkurus ǂharugub ǀkha ge tsoatsoa, xawe ta ge garu ta a hîa ge mîǁgui, marisa sâu tsî ta !kharaga !hanaǂûn !aroma !khomna nî ǁama tsî !hanaǂgās ǀkha tsoatsoa,” tib ge ra ǂâi-oa. 

“Tita ge ǀgôasisa xu ǂgariba a ǀnamsa, ti ǁkhoreb tita ti ûis !aroma ǀgui hâ tama xawe ta ǀhûhâsib nî domdore xu xū-i ai ǂâisa gere ǂnûi ǂgao amaga,” tib ge ge ǀaro. 

!Garo!ās hîab ra ǂgari-ais ge 60km ǀguiga Tsumeb !auga ǁgoe. Kurigu ra īseb ge Mupetamiba ǁîb di ǀnammi !hanaǂgāb diba !gâi!gâse ra ai!gû ǂharugub !nâ ge dawa!khuni. ǁÎb ge Spar ǁamaxu!khaib, Tsumeb ǂkhari ǂharugu-aon tsî OK Foods ai ǁîb !hanaǂûna ra ǁamaxu. 

ǁKhātib ge hōǂgās !aroma ǀgui ǂharuguba ūhâ tama hâ, xaweb ge Tsumeb Kairakhoen ǁGâub, ǀgôaro!hanab tsî sō-e tsēkorobe ǀhûhâsib ǂkhawusa khoena ra ǂûma !khaigu tsîn hoana !hanaǂûna mario!nâse ra mā ǂûǂûxase ǂûs !nâ-ū sorode omkhâis !aroma. 

!Gâi!gân ǀguinab ge Mupetamiba nē ǂharugub !nâ sī!nâ tama hâ, xaweb ge ǀnîkhamikō ǁgoaǂuidi aiǁgause, kaise ǀorose marisihuiba marisâuǂgaedi !nâ-ū hōs, hāǀaro ra huisenūxūn ǂhâsib ai dīǀoaǀoas tsî ǁkhaeǁoasa tsî !âubasenhe tamase ra hā ǂoab tsî ǀnanub mâsigu tsîna. 

“Kaise ra hā ǀnanub tsîn ge ǀapi tama is ǁkhās khami a ǁgai tsî kai ǂkhôaba ra !aroma, xaweb ge !gâiba hoaǁaeba tsūba ra ǁgoeǂam,” tib ge ge mî. 

Mupetamib ge 17 khoen, aoregu tsî taredi tsîn hoana !khōǂgā hâse sîsenmā hâ, ǁînab ǂans tsî ǁkhāsigu ǀkha hoaǁae ra ǁāǁāse.