Iuze Mukube 

Landless People’s Movements (LPM) di ǂgaeǂgui-ao tsî a danab, ǀkharaǀkharasiba ǂgiǂgos !nâ aimâbas dib, Bernadus Swartbooib ge !Gao!gao !Hūb di ǁûb, Sam Nuyomab di ǀumisa koasa gere mā. Swartbooib gere mîsa !oa di ge Nujomab di māǂgādi ǁaes !aromade ûitsēde !nae!khaidi !nâ nî hâhâ. 

Swartbooib ge ǂoa ge wekheb di Donertaxtsēs aib ge ǁîb ǂgiǂgo!nans di ǂhaitsi konferensis tawa gere !hoa soab ai nēsa ge mî. ǁÎb gere ǀgonǀgon!gaos ge, Namibiab di !nae!khaidi, !gōsase 60 kuriga xu ǀoasa tama hâsa, “Sam Shafishuna Nujomab” di ǀons ga ǂgai!nâhe tama i o. “ǂGui kurigu ǁgâiǀāb !nâb ge ǁîba ge ǁnā ǂgaeǂgui-aogu di ǀgui i, Namibiab !aroma, ǂnū khoen hîa gere ǁgâiǀāhen soab ai ge dans di ǁgauǁgausa ai ūkhâiba. 

Nausab Nujoma supuse nē daoba ge !gû tama hâ i, xaweb ge ǁîb ǂgaeǂgui-aosis tsî !âisab a tarib a !khaisas xa ǂgaoǂgao!nâsase ǂâisa !aromas ai ǂnûi tsî ǀguixasib ǀkha Namibiab !aroma ge mâ!kharu. 

ǁNāti i nî hās kara “khoe-i ǁî-i ûiba !norasasib tsî aitsamamâbasens !aroma nî ǁguiribas kara, o da ge ǁnā khoe-e nî !gôasib ǀkha nēti ī ǁaegu !nâ nî tawede, Nujomab ge ai!â gere ǂoa wekheb di Satertaxtsēs ai 95 kurigu ǀkha ge ǀomǀuni. 

Ai!âb ge Swartbooiba a mîs ge, Nujomab di ǂgaeǂguis !nakan ge Namibiab di ǂgiǂgos tsî ǀhûhâsib ǀgaugu tsîna a unuhesa. 

“ǁÎb suruden nē !hūbaib din ge mātaretoasa ana. ǁÎb ûibab ge ǁîb di ǁkhāsib ra mā-ams kōse ǀoasase ge ûiǂui, ǁîb ge ǂan iseb ge mâsigu, ǁîb tamas ka i o ǁîb di ǁae!gâs xa ǁkhāti ǁhûihe tamagu !naka nēsa gere dīse,” tib ge ge mî, ǁnāpab ǁkhauǂuisa gere dī !gâi ǂūsiga ǁgaus tsî !gôasiba māsa, hoa !hūbaib !nâb nē ǁnāǂoahâ !norasasib !gari-aoba ra !oabahe ǁaeb ai. 

“ǁÎb ge khâi tsî ǁîb ǂâiǀgauba kaise ge ǁkhōǁkhōsa i ǁaegu !nâ Afrikab !nâ gere mā,” tib ge Swartbooib ǁîb on ge ǀgui ǁae ǂgaeǂgui ra Swapo !Nans ǁani-iba gere mî. ǁÎb ge 2017ǁî kurib !nâ Swaposa xu ǂoa tsî LPMsa ge ǂnuwi, ǁnā ǁaeb ai ge ǁgâiba, xūn ǂhanuse nî !gûga ǂgaeǂguira !nansa mās !âs ǀguisa gere ǀhuruse. 

“Sada ge !gôasiba ǁîb di ǀaokhoen, ǁnurisan tsî ǁnurisan ǀgôana nî mā. Sada ge !gôasiba nî ǁgau tsî ǂan!gâsa Xristeǁîkhoeda ase tsî ǂgaeǂgui-aoda ase mā tsî !oaǂuib hâ sîǁarusa nē ǁgûba ǁîb di !gâi dīgu īǁoasa mâsigu !nakab ge !hūb âbab a ǀnam !khais !aroma gere dīgu !aroma,” tib ge tsâba ra ǁhaose ge mî.