ETUNDA – Sho Aanamibia nosho wo uuyuni tawu lili omukokolipresidente Sam Nujoma, onkelo yawo Julia Nujoma okwa hokola nkene ya putuka nosheeli shawo.
“Onkalo yaNujoma okuza kuushona oya kala tayi wilikwa kombepo yuuleli, okwa kala nokuhunganeka [onakuyiwa ye] yuuuleli okupitila muudhano, sho ta putuka, ano shoka oshipewa she okuza kevalo,” ta hokolola ngaaka.
Ta ti sho kwa li ha dhana nookuume ke okwa kala ashike oye folomona.
Ta ti, oha kala aluhe oye e lile kehe shimwe komeho pethimbo lyuudhano, na kehe shoka tashi ningwa oye aluhe te shi tokola, yo okuume ke taya landula shoka ta ti nenge ta ningi.
“Otandi dhimbulukwa nawa, ethimbo ndiya iikutu yokuzala oya li ya pumba, onkene Nujoma okwa li ha kutha oombale te dhi tungu dhi ninge omuzalomwa gwa fa oshuta, ndjoka kwa li tayi holola kutya oye kakukutu komatanga gwayakwao, nani oku shi ngaa shoka ta hunganeke,” ta popi ngaaka.
Julia okwa ti sha ikolelela kumeme gwawo okwa li ha hokolola kutya Nujoma sho a li ha kala kuusita okwa li hi igidha kutya ye ke na niilumbu, shoka kwa li hashi mu dhengitha oshoka okwa li he shi endulula olundji.
Ta ti, okwa kala noku shi ninga, ye ta pulwa kutya iilumbu mbi ta popi oyi li peni? Nonando ethimbo ndyoka kakwa li pena ngoka euvite shoka ta ti, nani ota hunganeke shoka shi li komeho.
“Nujoma okwa kala omulumentu omuvuliki, gwombepo ombwaanawa nokwa kala noku tu sila oshimpwiyu ongaamwayina aashona. Naashi a ningwa omupresidente gwotango gwaNamibia ombepo ye ombwaanawa inayi lunduluka,” ta popi ngaaka.
Okwa ti oya tekulilwa uuKriste, yo inaya kala haya longo mOsoondaha oshoka esiku lyokuvululukwa.
Ta gwedha po kutya Nujoma okwa kala nombepo yuuKriste sigo esiku lye lyahugunina.
“Otandi dhimbulukwa meme a tumu etumwalaka kuNujoma omanga e li kiita ta ti, ngele owa hala okusindana iita mbyoka, kondja u na Kalunga komutima, ihe ngele ku mu na nena ito sindana,” ta hokolola ngaaka.
Sho a li a pulwa kutya oyu uvite ngiini sho tatekulu Nujoma ta ka fumbikwa koHeroes Acre, ihe hakOngandjera hoka ku na aakwanezimo ye,okwa yamukula kutya ongaakwanezimo kaye na nando uupyakadhi naashoka.
Ta ti, okukapewa egumbo lye lyahugunina kehala lyomapendafule otashi ulike esimano osho wo iilonga ye a longela oshilongo shika, onkene ye ependafule.