Presidente Netumbo Nandi-Ndaitwah age kakere gumwe ana kukwatesako egano lyangesi mokutulisapo asi embo lyana kufa Hage Geingob likare Presidential Centre. Eyi kayikweme apa kavayamutanterere asi embo lyaGeingob lyopaumwene ngesi tavakalitjindja likare nye evango lyopingwa ntani lyokuninkira makona kono kohemo tupu zikapwe mvhura ezi.

 Mbudi ezi kazibubukire konyima tupu zosigongi kembo lyenene lyepangero moVenduka nkera pokatji kaPresidente ntani munasipundi gwanare gombongarero zanavenye ntani yige hena ana kara munasipundi gevango eli Peter Katjavivi, ogu kageve nye asi yinke vana ruganako dogoro papa ngesi. ‘’ Sitambo esi kasininkisirenge nikamone Presidente sokukatanterako ntani nokumupamo momunene asi dogoro papa yinke varuganko mokutanta asi Pevango eli Hage Geingob centre. ‘’ Ose hawe tuna zi unene komeh. Ose kuna rugana unene, mokukwama tupu omu twatura magano getu  gaze mosirugana moomu twayigazarere,’’ yimo ana kutanta Katjavivi.

Age katente asi komitiye zegendeso nare vazitulisapo, mokutara asi projeka ngapi zina kugenda ntani magano nagenye vahepa kugatura mosirugana. ‘’ Evango lyangesi ngalikara poopo pembo lyanakufa Hage Geingob.’’ Eli lina kara asi tavakalitjindja likare nye centre eli navakaruganena sirugana sangesi,’’ Age kagwedereko, ‘’ ame kwato evango limwe eli nina kugazara hena kugusako embo lyendi age nakufa.’’ Evango eli ngalikara asi lyokukara noyininke eyi twaweka ntani yimwe yokulikida kovantu, omu vatungimo, vadivi yomakona kono ntani vadinguli ngavalironga kuhamena eparu lyaGeingob noumpitisili wendi. Awo ngava kara nonombapira, mafano, yihuyungwa, ntani nayinye eyi ngayikara pevango limwe tupu. Age simpe katente asi evango eli ngalilikida yirugana yaGeingob, siruwo oso vakare asi kunakukondjera sirongo sikamanguruke, siruwo esi gakere koUnited Nations Institute ruha rovaNamibia, ntani sirugana sendi asi nkurumionistera, ministera kokabinete dogoro popo nye ana yasiki koupresidente. ‘’ Nayinye oyo nayikara nye yimwe yokuvhura kuruganesa eyi nye tuna kupapara.

 Ntani ose simpe kuna hara nye kugwana eyi gagwene age mwene muzuni mauhwi, aga gana kara asi kwagasiga kembo lyepangero ntani nkenye oku gana kara. Katjavivi katente asi mbunga zendi kwatulisapo malizuvho kumwe nomavango gokufana ngesi, moyirongo ngwendi United State, South Africa ntani Nigeria. Katjavivi katente asi nombudi ndi mauzera gamwe ngagawiza vagagave komeho zika pwe mvhura ezi, moomu tupu gana kuza marongikido.

‘’ Twasihuguvara, asi komeho tukasike kehagero lyomvhura, hawe nokazuvha nombudi donongwa unene mokudivako asi yinke tuna rugana, yimo ana kutanta. -ljason@nepc.com.na