Opolifi oya koleka tai ti omunailonga umwe ta longele koNAMDIA okwa kwatwa po oshivike sha dja ko natango mekwatafano lomunyeka wokawe kehangano loNAMDIA.

Omunailonga ou tete okwa kala a kufwa moilonga pefimbo okudja omudo wa dja ko ta ningilwa omakonakono.

NAMDIA ehangano olo hali tuvikile okawe ngeenge taka di keemina.

Mopaife ovanhu vakwatwa po mekwatafano lomunyeka wokawe koNAMDIA ove li vane.

Omudo wa dja okwa lopotwa ovalumenhu va ponokela eembelewa doNAMDIA koWindhoek efimbo lokomatango ndele tava vake mo ouwe.

Vamwe vomovatamanekwa vavali Sam Shololo naJoel Angula ove li modolongo shaashi vati navo ova kufa ombinga momunyeka wokawe.

Omakonakono oibofa yavo otaa twikile.

Poshiningwanima opo opa dipaelwa omunailonga woNAMDIA kwa li ta longo ongomukulunhu koshikondo sheameno, Eiseb Francis weedula 57.

Francis okwa yashwa nondjebo momutwe kovafekelwa pefimbo kwa li e li kombelewa ta longo.

Opolifi oya hokolola tai ti pefimbo loshiningwanima umwe womovafekelwa Max Endjala okwe liashela nondjebo meembelewa doNAMDIA eshi a mona kutya okwa fitikininwa mo kopolifi. 

Endjala okwa ka xulifila koshipangelo efiku olo tuu olo. 

Omupopiliko wehangano loNAMDIA, Beverley Coussement okwa koleka ta ti opolifi oye shi pondola okumona okawe ke li pongushu yeemiliona N$40.6 oko kwa li ka vakwa neudo koNAMDIA.

Okwa ti ongushu youwe va vakwa koNAMDIA oi li peemiliona N$314.9.

“Okawe kongushu yeemiliona N$274 inaka monika natango. Opolifi oye lipyakidkila nokuninga omakonakono,” ta ti.

-fhamalwa@nepc.com.na