WalvisBay-Hompa Zacharias Seibeb vantu ava vana kumukwatesako vezimo lyoDaure Daman Traditional authority awo kuna parapo asi Hompa gwawo kapi tavamugusa mouHompa kukwama kweyi karugene Munistera gonodoropa nonomukunda dokomambo James Sankwasa omu vana kuyimona awo kuna kuruganesa veta ezi zina pili kukarapo ntani kuna kupitakana unene vata omu zina kutanta nokuyalipakerera unene kweyi yompo pantateko.
Eyi ana kurugana kapi tovhuru muntu kuyitarerera,morwa tuna diva asi ministera kuna kupitakana momunene kweyi ana kurugana,’’ yimo ana kutanta. Mokiuvapuranye asi aw okapi vana kurwanesa etokoro lyaMinistera, Matsuib katente asi age kapi tavhuru kulimburura oyo, morwa awo simpe kuna kupongayioka mauzera. ‘’
Ame kapi nina kara nononkondo dokuvhura kugava nkenye eyi apa tuna kuhuyunga ngesi morwa sininke sangesi kuna kusitarurura pontambo zokuzeruka,’’ yimo ana kutanta. Eguso paveta kwawizirapo morwa mbunga ezi zapira kuhara Seibeb zasivanene asi Hompa ogu kurugana unene umbondo, unene kuruganesa yimaliwa mepuko, ntani esivano limwe asi Seibeb eturo lyendi mouHompa kapi vakweme ngendeseso omu zawapera. Etokoro lyangesi kuna kara nye asi kwakwama vetantokorwa zina kara mo 8(1) ezi zakara moveta zomagendeso gompo vaturapo mo kukwama sintokorwa so 2000 kuna kugava nonkondo asi Seibeb epangero lyahepa kumugusamo mouHompa. Sankwasa,posiruwo nye esi vakere nosigongi kumwe nonombunga edi mbali, kwatente asi Hompa ogu gatusika kwatumbwire Seibeb, asi yige ngagusa evango eli lyouHompa, nye nampili ngoso etumburo tupu kapi yina kutanta asi yinagwanen, morwa kapi vayigeve konkarapamwe asi vayipulisire.
‘’ Mokuninkanye asi etumburo likare nomulyo, vahepa nkarapamwe ziyinkondo peke. Ntambo zangesi kapi vazikwama, eyi nye yina kara asi etumburo lyelike kapi yina siki mouta wakora,’’ Sankwasa yimo nye ngoso katjenge mombapira zendi katjangerere kwaSeibeb. Morwa nokonda nye dangesi, ministera yipo nye katente asi nayinye eyi yahoroka yahepa kuhaga yipo vakakwame ngendeseso zoDaure Daman mpo zawo. Mokukwama nye yangesi, mukurona gumwe gomoUis kwazigidire vantu omu nye vayahorowere Isaskar Tourob asi Hompa.
Mukurona Amigo Napuka, ogu nye gagendesere elikwamo eli, katente asi Seibeb nare vamugusamo moUhompa komeho mbapira zaministera Sankwasa ziwize. ‘’ Ose kwakwama ngendeseso omu zakara. Ose kwazigida vakurona navenye, omu twageve mazuva 14, komeho tuyakara nosigongi. Pepongo nye lyangesi, mbapira zaministera ntani nonkondo dovakondi kwayiresera. Vakandindate vatatu kwavatumbwire, poopo Tourob yipo nye gafundire,’’ yimo ana kutanta Napuka. Sankwasa kwageve mbudi ezi kwaSeibeb momandaha omu gageve erondoro asi miniteli kwakurugana egusomo lyaSeibebeb mokukwama vetantokorwa 8(1) ano nazinye zonompitisili dopampo zomo 2000. Edeklerk@nepc.com.na