Auleria Wakudumo
Ehangano lo-O&L Leisure otali ifana Ovanamibia novaAfrika koonono opo va twale oindulukomwa yavo konhele yokulandifila oyo va eta po i li koStrand Hotel moSwakopmund.
Ehangano ola holola kutya ola eta po onhele ei yomalandifilo a longekidwa nawa omo tamu kala tamu landifilwa oulongomwa vanini, ovo hava landwa kovatalelipo ongomaano ile oidimbulukifo ngeenge tava shuna koilongo yavo.
Omupopiliko wa-O&L Leisure Roux-che Locke okwa holola kutya otava indile Ovanamibia va yambule po oindulukomwa ei ya ndulukwa moshilongo tave shi ningi pamukalo wokutwala oinima yavo opo va dule okumona mo oyuuyemo.
“Ovataleli okudja kondje yoshilongo novakalimo vomoNamibia ohave ya okulitalela ko koindulukomwa voovene. Oindulukomwa ohai yambula po omufyuululwakalo woshilongo osho yo okukaleka po onakudiwa yaNamibia,” Locke ta ti.
Locke okwa ti okulanda oindulukomwa ponhele apa hapa kala ovatalelipo vahapu moshilongo ohashi kwafele opo ovatalelipo va kwatafane novanhu noupu moshilongo.
Ohashi kwafele yo opo avanduluki vashona va mone oyuuyemo eshi oindulukomwa yavo tai landifwa.
“Keshe oshindulukomwa ohashi yandje ondjokonona yasha, hano ngeenge to lande oshinima shonhumba, nena oto kala wa humbata ondjokonona yaNamibia,” Locke ta ti.
Oindulukomwa ohai dulu kukala oilyenge vomofingo, poshikesho ile keemhadi, oimbidja, omambale, oikwatelwa nakeshe osho omunhu ta dulu okunduluka.
Omukulunhuwiliki wo-O&L Sven Thieme okwa holola kutya ehangano lavo ohali ulike ounongo wovanduluki Ovanamibia, Ovaafrika novanduluki okudja kondje yaAfrika.
O&L Leisure oha ulike yo ounongo wovahongi novanduluki okudja keembinga adishe daNamibia.
Ovati ohava longele kumwe nomahangano ngaashi Omba Arts Trust, ehangano olo hali yambula po oihongomwa yokomikunda novanduluki vayo.
Ovahondji va pyokoka okudja koshitukulwa shaKavango oshoyo koitukulwa yokonooli ohava nduluka oimbale yomaludi a yooloka iwa omanga ovahongi voJu/Hoansi okudja koKalahari moshitukulwa shaTjozondjupa nOmaheke hava hongo oilanda neendjeva momayi eemho.
Oindulukomwa yokomake aishe ei ohai kaleke po omufyuululwakalo nondjokonona yaNamibia nokuyandja oyuuyemo kwaavo tavei nduluka.
“Ohatu indile Ovanamibia novatalelipo va talele po okafitola ketu kotete mohotela yoStrand moSwakopmund, va djepo nondjokonona yaNamibia,” Thieme ta ti.