|AEǁGAMS – Skol|gôana ǂgaoǂgao!nâs !gâise skoli !nâ dīs !aromas ge, Elombe Faith Foundationsa (EFF), ǁnā |gôan hîa ǂoaǂamsase ǁîn skolgu !nâ ra ǁkhā-ǁkhāsenna mâ semesters |unis hoas ai mādawa-amde nî mā. Nē skolgu ge nausa hoa Namibiab ǂhabase !khōgāhe tide xawe |awas |nî skolga xu |gui nî hâ. Projeks nēs ge Tuye Koskola ti a ǂansa hîa a daskol!gû ti |gui ra ǂâibasensa. Danaǂâiǂam!khais nē projeks ǁ-îs !naka mâs ge ‘Skoli ge a ǁkhoaxa, ǁKhāǁkhāsens ge a !gâi’. Nē projeks di !huis ǁanin di |guib, Erastus Tsempo Hidishangeb ra mîsa !oa-i ge a ǂhanu tsî !gâi ǁae |gôana noxopan ǁkhāǁkhāhen hâ xūna !khōmâi hâ hîa ǂgaoǂgao!nâsa !garise ǁkhāǁkhāsens a ǂhâǂhâsa !khaisa ǁîn tsî !hūb di !goaxa ǁaeba ǁawoǁawos !aroma.
Hidishangeb ge ge mî, nē projeks nē semesters |ams ai |nai ra ǂnāǁnâsa ǁîs di mādawa-amdi |kha.
“|Nai da ge ǂanǂanǂkhanide skoldanagu ǁga ge xoa hoa ǂgao|khādi tsî xūna ra ǁgui!āse tsî nēsi |nai ǂhomisase nē semesters di !nurigu |guiga !âu hâ,” tib ge ge mî. !Gâi!gâse nēs !nâ nî !kharu |gôan ge ǂkhanin, mîdiǁuib ǂkhanidi, xoaxurun, xoa!amgu, |ari-ūdan, |nō-ūdagu, !gôa-ūsedi tsî skolǂkhanin ǁgarugu tsîna nî !khō!oa. Hidishangeb ge ams tsîna nî !amǁare nē projeks ǂnamipe tsî ǁîb di ǂgaoǂgao!nâdi hîab skolgu tawa ra ǁkhaeǁnâdi tsîna nî !khōǂgā ǁîb tsîn a |omkhâi ra ǁnae-aon di |gui amaga. “|Gôan ge a !goaxa -ǁaeb di ǂgaeǂgui-ao tsî !gâi xū-i hîats khoetsa nē ǁaeb !nâ a dī ǁkhā i ge ǁîna |gaisase ǂgaoǂgao!nâs |guisa, ǁ-în !nâ ǂkhawusa i ga xawe ǁguiris !nâ-ū tsî ǁîn !goaxa îxa ǁaeba ǁawoǁawos |kha,” tib ge ge mî. Nē ǂnûiǂgās ge mari-e kuru tama ǂnûiǂgās hîa nē kurib !Khanni !nâ ge ǂnuwihesa, dana ǁgūbas âs skol|gôana ǂgaoǂgao!nâs ai |gui !ammâisase. Sao ra skolgu ge nēpa a !khōǂgāsa: Oniiwha !Amǁaresa Skoli, Elombe !Amǁaresa Skoli, Likokola !Amǁaresa Skoli, Onamutene !Amǁaresa Skoli, Oniigwena !Amǁaresa Skoli, Onankali North !Amǁaresa Skoli, Ombinga ǂAm Skoli, Okaye Kenongo ǂAm Skoli tsî Natangwe Uugwannga Junior Sekondere Skoli tsîna.