Hoa!nâ-aixa Xoamâisens ǁHûi-aon (GRV) dis ge ǀguitimî tsî 3 Gamaaeb 2024 dis ai tsoatsoasa xu 22 Gamaaeb dis kōsen ge ǀhaob ai 536 202 Namibiaǁ-în hîa ǁhûi ǁkhās di ǂgaoǀkhādi ai ra dīǀoaǀoana xoamâisen hâ. 

Nē !gôab ge ǁnān hîa !auga!hūgu di !hūǂnûǁkhaebadi tawa a ssenxan di xoamâisendi hîa nēsis kōse 1 000 ai mân tsîna !khōǂgā hâ. 

“!Hūb di ǁanǂgāsaben ge ǀoasase a ǂanǂansa, hoa!nâ-aixa ǁhûi-aon xoamâisens !hūb !nâ tsî !auga!hūgu !nâs tsîna 1 Aoǁkhumuǁkhâb 2024 dis kōse nî !khoe !khaisa. Xoamâisendi !aroma a aiǂhomisa !khaigu ge Mantaxtsēsa xu Satertaxtsēs ǁga, 08h00 xu 19h00 kōse a ǁkhowa-amsa,” tib ge Petrus Shaamab ǁhûidi !aroma dana mâisase ra sîsenna ge mî. 

Ai!âb ge -ǁîba Namibiaǁîna ge ǂgan, noxopan ga xoamâisen tama i, o !noe!noesen tsî ǁnāsa dīsa, ǀnai ge mîhe hâ i khamis ǁhûidi ǀAwemā!nansa hāaro ra ǁaeba 1 Aoǁkhumuǁkhâb disa nî !kharuse mā tide amaga. 

Nē !gôagu di ǀgoraǂgāb ge ra ǁgau, 35 kurin !naka hâ tarekhoedi 58 886 ai mâ ǁnāpa gu ǁkhā kurin di aorekhoega 59 811 ai mâsa. 

Tarekhoedi hîa 35 kurin xa a !nāsa kurin âdi ge 101 371 ai mā tsî aoregu -khā kurin diga 98 243 ai. 

Namibiab hîa ǀgūǁ-aegu !nâ 3 miljuns -ǁanǂgāsabena ge sī!nâb tsî ǁnāpa xus 70% dina a ǂkhamkhoe !khais ge !âubasens !nâ taren nē ǁhûidi !nâ a !âubasenhe ǁkhā !khaisa ra aimûǀgaru. 

Universitaits Namibiab dis senior ǁgau!nâ-aob, Ellison Tjirerab ge New Eraba ge mîba, ai!â ge hâ i ǁhûidi ge a -ǁgausa, xoamâisen tsîn khoena ǁhûi tama ra i !khaisa tsî I -nā-amaga nēsis kōse xoamâisen hâ 500 000 khoena ǂgaoǂgao!nâs, in xoamâisens ǀguis ose ǁhûis tsîn !nâ am!nâxas ǂnamipe kai sîsenna nî dīhesa. 

!Nāsase gere mā-oan ge a ǂkhamkhoe tsî di ge ǂgiǂgo!nandi tsîna ǁHûidi !Nans Namibiab (ECN) dis ǁkhā khami kai !ereamxasib ǂkhamkhoes diba ūhâ. 

Namibiab !Hūǂnûǁkhaeba-aob Cubab !nâb, Samuel ǀGôagoseb ge ge mî, ǁîn ge -ǁnāpa a ǁ-awoǁ-awo !khaisa, ǁnāpa hân hoatsama !ēs xoamâisens disa hō tsî ǁkhāti ǁhûi domgu ân tsîna nî ǁawoǁ-awo !khaisa. 

Namibiab !Hūǂnûǁ-khaeba-aob, Chinab !nâb, George Elia Kaiyamob ge New Eraba ge mîba, ǁîn ǀoasase xoamâisendi tsî !goaxa ǁhûidi !aroma ǂhomisen hâsa. ǂGuro !nān ge ǁaupexa 700 000 !hūǁîna ǁîn di demkratise ǂhanuga ge sîsenū hâ i.