Auleria Wakudumo 

Minista womauyelele nomakwatafano opaungoba Emma Theofelus okwa indila Ovanamibia opo va twaalelafane okuya koshivilodimbuluko shOmukokolipresidente Sam Nujoma osho tashi ka ningwa koitukulwa ya yooloka moshilongo. 

Theofelus okwa holola ta ti epangelo itali ka tuta ovakwashiwana okuya keenhele odo, ashike ota indile ovakwashiwana va longele kumwe. 

“Ohandi indile oukunikumwe movakwashiwana opo va twaalelafane meendjila. Osha fimana okulongela kumwe pefimbo eli okukwashilipaleka kutya otwa findikila tatekulu nombili. Ohandi indile yo ovakwashiwana va holoke momwaalu muhapu okufindikila ependa letu,” Theofelus ta ti. 

Nonande epangelo itali ka tuta ovakwashiwana okuya koitukulwa oyo tai ka ningilwa oshivilodimbuluko shomukokolipresidente, omalelo oitukulwa imwe okwa shivifa kutya otaa ka tuta ovakwashiwana neebesa okudja peenhele da yooloka. 

Elelo loshitukulwa shaShana otali ka yandja eebesa mbali depangelo. Eebesa otadi ka tuta ovakwashiwana okudja moshitukulwa va uka kokapale komaudano kEenhana moshitukulwa shaHangwena mEtitano lomafiku 21 Febuluali 2025. 

Obesa yotete otai pitula ovakwashiwana okudja pondalaye yaElim po 07h00 yongula, tai twikile okupitula pUukwangula po 07h30, taku shikula ombelelwa yelelo loshitukulwa shaShana po 08h00, tai pitula ovakwashiwana pOkatana Service po 08h30 ya finda kEenhana. 

Obesa onhivali otai ka hovela po 07h00 pOnamutai, tai pitula vali ponhele pomaulikilo oipindi mOngwediva po07h30, ya finda puAdolf po 08h00, Akuna po 08h30, nolwaxuuninwa otai ka pitula ovanhu ponhele yomaulikilo oipindi mOndangwa po 09h00 ya uka kEenhana. 

Ngoloneya woshitukulwa shaShikoto Penda Ya Ndakolo okwa holola ta ti ombelewa yaye otai ka ninga omalongekido oyeendifo okutwala oshiwana kodoolopa yEenhana noGrootfontein oku taku ningilwa oshivilodimbuluko. 

Eenhele apa tapa ka tutwa ovakwashiwana moshitukulwa shaShikoto otadi ka shivifwa kohainga nena. 

-wakudumoauleria@gmail.com