Auleria Wakudumo
Minista wouhaku, Dr. Esperance Luvindao okwa pataneka omapopyo oo taa ti kutya ovenda yoHuman Papillomavirus (HPV) ohai eta okuhamona ounona.
Luvindai okwa li ta popi momutumba wopashiwana moWindhoek, Etivali.
Oshilyo shongudu yoLandless People’s Movement Eneas Emvula oye a tukulula omapopyo aa, ta pula minista kombinga yomapopyo ovenda ye lihanena ounyuni.
Emvula okwa holola kutya vati ovadali novakwashiwana otava ti kutya ouministeli wouhaku owa tameka nale okutunhila ounona meefikola nonande ovenda tai ngungutulwa kutya otai eta omukifi wokaanghela, oitumba koshidalelo osho yo okuimba ovakainhu okumona ounona.
Emvula okwa indila minista wouhaku opo a yandje omhito kovadali opo va kale ve na etokolo ngeenge ova hala ounona vavo va vendwe.
“Ovenda ei oya popilwa mowii koilongo ihapu mounyuni ngaashi moUganda nomoshilongo shetu. Vahapuovahololakutya ovenda ei oi na oshilanduli monghalamwenyo younona ovo tava vendwa eshi tava ka ninga ovakulunhu nokukala va hala okumona ounona wavo,” Emvula ta holola.
Ovenda ei ohai tunhilwa ounona voukadona okudja peedula omuwoi fiyo eedula 14.
Ouministeli owa holola kutya otau ka hovela otunhila lwomuJuni naJuli, she likolelela kokaliindeli kouministeli wehongo.
Minista okwa kwashilipaleka kutya ouministeli inau hovela natango okutunhila ounona novenda ei.
Luvindao okwa pula Emvula opo a holole omadina eefikola adishe odo a ti oda hovela nale omatunhilo ounona. “Ngeenge ope na ava tave shi ningi, tu kwafela u ete omadina avo opo ouministeli u katuke onghatu yopombada noyomeendelelo,” minista ta pula ngaho.
Ouministeli wehongo nao owa holola kutya kau na eshiivo moshikumungu sheefikola odo vati tadi ningi nale omatunhilo.
Luvindao okwa fatulula kutya ovenda yo-HPV ohai tunhilwa ounona voukadona opo i keelele oitumba koshidalelo, okuamena ovakainhu okukwatwa komukifi wokaanghela yokoshidalelo.
“Ovenda ihai et a okuhamona ounona ngaashi tashi fekelwa moshiwana. Ovenda ohai kwafele okuhakwatwa komukifi wokangela yokoshidalelo oo wa twaalela oomeme vahapu moshilongo shetu” Luvindao ta ti.
Minista okwa yelifa kutya ovenda itai dengele na kape na okaana taka ka fininikilwa ovenda ei. Nande ongaho, Minista okwa ti ouministeli owe lipyakidila nokuyandja ouyelele womondjila kombinga yovenda ei opo ovadali va ninge omatokolo e li mondjila. Luvindao okwa ti ovenda yo-HPV hapo tai ya moshilongo.
“Ovenda ei oya kala moNamibia okudja mo2007 ashike oya li ashike hai kala moipangelo yopaumwene. Otwa mona nghene ovakainhu vahapu hava lumbu nokukondja nomukifi wokaanghela yokoshidalelo nonghene ouministeli wa ninga etokololo okueta ovenda ei koipangelo yepangelo,” Minista ta ti.
Ovenda ei ohai yandjwa koukadona omanga inava hovela okuya momilele.
“Omukifi wo-HPV ohau tandavele okupitila momilele, onghene osha fimana okuvenda ounona voukadona omanga inava tameka omilele opo va kale va amenwa,” Luvindao ta ti ngaho.
-wakudumoauleria@gmail.com