ONGWEDIVA – Oshiningwanima shitilifa shomunambelewa wopolifi omulumenhu Kornelius Nghitewapo oo a kana oule weedula nhatu ashike fiyo onena kape na ouyelele kutya oku li peni onghee sha tula ovakwapata vaye melimbililo. 

Okwa kana pefimbo e na omido 46. 

Omukulunhu wopolifi moshitukulwa shaShana Commissioner Naftal Sakaria okwa koleka onghela ta ti fiyo opaife inava mona omupolifi ou. 

“Inatu mona oshiwana tashi yandje ouyelele kombinga yomulumenhu ou,” ta ti. 

Ovakwapata vaye ova ninga eenghendabala dokukonga omupolifi ou ashike ina monika fiyo paife. 

Umwe womukwapata waye Junias Nghitewapo okwa koleka ta ti Kornelius okwe lixulwa okumonika momafiku 29 Desemba 2023. 

Otaku hokololwa kutya omupolifi ou okwa li ha di mOshakati nokwa li ta longele poshitaashi shaShakati. 

“Otwa limbililwa shaashi katu shi ngeenge mumwamememati oku li momwenyo ile okwa xulifa. Otwa ninga yo vali eenghendabala doku ya komavalulilo ombaanga yaye opo tu tale ngeenge oshimaliwa shaye ohashi kufwa ko ile oko shi li,” ta hokolola. 

Onghee okwa ti nomavalulilo ombaanga yaKornelius otaa ulike kutya oshimaliwa shaye ihashi kufwa ko nombaanga yaye ihai longifwa vali. 

“Paife omavalulilo ombaanga yaye otwe a pata manga opo tu tale ngeenge ota i kombaanga e ke a patulule,” ta hokolola. 

Junias okwa ti opolifi oya ninga eenghendabala doku mu konga momilamba domeva nelalakano lokutala ngeenge pamwe okwa wila momeva. 

“Ohatu lipula kutya pamwe okwa ya kondje yoshilongo molwaashi otwa nyengwa paife oku mu mona,” ta ti. 

Okwa weda po ta ti ongodi yaye kai li momhepo notai ulike ye li xulwa okulongifwa momafiku 29 Desemba 2023. 

Kornelius okwa dile komukunda Omundudu moshitukulwa shaHangwena. 

Okwa li a teelelwa okukala a tameka oilonga momafiku 8 Januali 2024 ashike koilonga ina ya ko. 

Oshiwana otashi indilwa kwau e na ouyelele opo shi kwatafane keenomola dongodi 0812090336 ile 0812045696. 

-fhamalwa@nepc.com.na